وزیراعظم شہباز شریف نے کہا ہے کہ 5 جنوری کو اقوام متحدہ کی سلامتی کونسل کی قراردادوں میں کشمیری عوام کے حقِ خود ارادیت کو تسلیم کیا گیا تھا۔ کشمیر کے یومِ حقِ خود ارادیت کے موقع پر جاری اپنے بیان میں وزیراعظم نے کہا کہ 5 جنوری 1949 کو یو این کمیشن برائے بھارت و پاکستان نے ایک تاریخی قرارداد منظور کی، جس میں ریاست جموں و کشمیر کے مستقبل کا فیصلہ آزادانہ اور غیر جانبدارانہ رائے شماری کے ذریعے کرنے کا عہد کیا گیا تھا۔
وزیراعظم شہباز شریف نے افسوس کا اظہار کرتے ہوئے کہا کہ بھارت کے جموں و کشمیر پر غیر قانونی قبضے کے باعث یہ وعدہ آج تک پورا نہیں ہو سکا۔ انہوں نے کہا کہ مقبوضہ کشمیر کے عوام گزشتہ آٹھ دہائیوں سے بھارتی قابض افواج کے مظالم کا سامنا کر رہے ہیں، تاہم بھارتی جبر و تشدد کے تمام ہتھکنڈے کشمیری عوام کے عزم کو کمزور کرنے میں ناکام رہے ہیں۔
وزیراعظم نے بین الاقوامی برادری سے مطالبہ کیا کہ وہ بھارت کے جابرانہ اور غیر قانونی اقدامات کے خاتمے کے لیے مؤثر اور عملی کردار ادا کرے اور اقوام متحدہ کی قراردادوں پر عملدرآمد کو یقینی بنائے۔ انہوں نے کہا کہ پاکستان کشمیری عوام کی منصفانہ جدوجہد کی اخلاقی، سیاسی اور سفارتی حمایت جاری رکھے گا۔
واضح رہے کہ آج پاکستان، آزاد کشمیر اور دنیا بھر میں مقیم کشمیری 5 جنوری کو یومِ حقِ خود ارادیت کے طور پر منا رہے ہیں، تاکہ عالمی برادری کو اقوام متحدہ کی قراردادوں اور کشمیری عوام کے بنیادی حق کی یاد دہانی کرائی جا سکے۔
