کوئٹہ اور چمن سمیت بلوچستان کے سرحدی علاقوں میں موسمِ سرما کی پہلی بارش کے بعد سردی کی شدت میں نمایاں اضافہ ہو گیا ہے۔
پاک افغان اور پاک ایران سرحدی علاقوں میں موسلادھار بارش ریکارڈ کی گئی، جس کے نتیجے میں متعدد نشیبی علاقوں میں پانی جمع ہو گیا۔ بارش کے باعث شہریوں کو سرد موسم کا سامنا ہے جبکہ بالائی علاقوں میں ٹھنڈ مزید بڑھ گئی ہے۔
کوژک ٹاپ، شیلاباغ، قلعہ عبداللہ، ژڑہ بند، توبہ اچکزئی اور خواجہ عمران رینج میں بھی بارش کے باعث سردی میں اضافہ دیکھا گیا۔ بعض علاقوں میں حدِ نگاہ متاثر ہونے کی اطلاعات بھی سامنے آئی ہیں۔
محکمہ موسمیات پاکستان کے مطابق مغربی ہواؤں کا سسٹم اس وقت بلوچستان میں موجود ہے، جس کے باعث بارش کا سلسلہ جاری ہے۔ محکمہ موسمیات نے کوژک ٹاپ اور دیگر شمالی علاقوں میں پہاڑوں پر برفباری کا امکان بھی ظاہر کیا ہے۔
محکمہ موسمیات نے شہریوں اور مسافروں کو احتیاطی تدابیر اختیار کرنے کی ہدایت کی ہے، خاص طور پر بالائی علاقوں میں سفر کرنے والوں کو موسم کی صورتحال کے پیش نظر محتاط رہنے کا مشورہ دیا گیا ہے۔
