بھارت :ایئرپورٹ پر ایئر ٹریفک کنٹرول کے سسٹم میں ٹیکنیکل خرابی

بھارتی دارلحکومت دہلی کے ایئرپورٹ پر ایئر ٹریفک کنٹرول کے سسٹم میں ٹیکنیکل خرابی کے باعث 100 سے زائد پروازیں تاخیر کا شکار ہوگئیں۔
غیر ملکی ذرائع ابلاغ کے مطابق ایئرپورٹس اتھارٹی آف انڈیا کے زیرِ استعمال آٹو میٹک میسج سوئچینگ سسٹم ٹھیک طرح کام نہیں کر رہا تھا۔ سسٹم میں خرابی کے سبب کنٹرولرز کو فلائٹ پلانز دستی طور پر پراسس کرنا پڑے جس کے نتیجے میں پروازوں میں تاخیر ہوئی۔
ایئرپورٹ کے حکام نے مسافروں سے اپیل کی ہے کہ وہ اپنی متعلقہ ایئر لائن سے رابطے میں رہیں اور روانگی کے وقت کی تازہ ترین معلومات حاصل کریں۔دہلی ایئرپورٹ روزانہ تقریباً ایک ہزار پانچ سو پچاس پروازوں کو سروس فراہم کرتا ہے۔
اس سے قبل امریکی ریاست ٹیکساس کے شہر ہیوسٹن آنے والی پرواز میں بم کی افواہ کے بعد ریگن ایئرپورٹ پر پروازیں معطل کر دی گئیں تھیں۔
فوکس نیوز کے مطابق رونالڈو ریگن نیشنل ایئرپورٹ پر اس وقت ہنگامی صورتحال ہو گئی جب امریکی ریاست ٹیکساس کے شہر ہیوسٹن سے آنے والی پرواز میں بم کی موجودگی کی افواہ پر تمام پروازیں معطل کر دی گئیں۔
امریکی وزیرِ ٹرانسپورٹ شون ڈیفی نے پلیٹ فارم ”ایکس”پر وضاحت کی کہ یہ دھمکی یونائیٹڈ ایئر لائنز کی ایک پرواز کو نشانہ بنانے کی تھی، جو ہیوسٹن ریاست ٹیکساس سے آ رہی تھی۔
افغانستان میں انٹرنیٹ کی بندش، پروازیں منسوخ، بینکنگ کا نظام مفلوج
ایئرپورٹ حکام نے اس اطلاع کے بعد متعلقہ طیارے کو ہوائی اڈے کے ایک محفوظ اور علیحدہ حصے میں منتقل کر کے مسافروں کو طیارے سے محفوظ طریقے سے نکال کر ہال منتقل کردیا۔
بعد ازاں جہاز کو مکمل تلاشی لینے کے بعد ہر قسم کے خطرے سے کلیئر قرار دے دیا گیا۔