راولپنڈی :افغان باشندوں کو مکان کرایہ پر دینے والے 5 مالک مکان کو گرفتار کرلیا گیا اور 74 غیر ملکی افغان باشندوں کو تحویل میں لے کر ہولڈنگ سنٹر منتقل کر دیا۔
تفصیلات کے مطابق پولیس کی غیر قانونی طور پر مقیم افغان باشندوں کے خلاف کارروائی جاری ہے، کارروائی کے دوران کرتے ہوئے باشندوں کو مکان کرایہ پر دینے والے 5 مالک مکان کو گرفتار کرکے 20 مقدمات درج کرلیے گئے۔
ترجمان پولیس نے بتایا کہ کارروائی میں 74 غیر ملکی افغان باشندوں کو تحویل میں لے کر ہولڈنگ سنٹر منتقل کر دیا گیا۔
پولیس کا کہنا ہے کہ غیر قانونی مقیم یا غیر ملکی مکان، دکان یا کوئی بھی پراپرٹی کرایہ پر نہیں لے سکتے۔
پولیس نے مزید کہا کہ شہری اپنی پراپرٹی کسی غیر قانونی مقیم غیر ملکی کو فروخت بھی نہ کریں اور نہ ہی اپنی گاڑی،رکشہ یا دیگر اشیا بھی غیر قانونی مقیم غیر ملکیوں کو دیں۔
پولیس حکام نے خبردار کیا ہے کہ خلاف ورزی کرنے والوں کے خلاف سخت قانونی کارروائی کی جائے گی
