ریچھ رانو کو منتقل کرنے کے لیے مقررہ سائز کا آہنی پنجرہ تیار

کراچی : ریچھ رانو کو گلگت بلتستان منتقل کرنے کے لئے مقررہ سائز کا آہنی پنجرہ تیار کر لیا گیا ہے، تاکہ منتقلی کے دوران دباؤ یا خطرہ کم سے کم ہو۔
تفصیلات کے مطابق چیف سیکرٹری سندھ کی زیر صدارت رانو ریچھ کی گلگت بلتستان منتقلی کے حوالے سے اہم اجلاس ہوا، جس میں منتقلی کی تیاریوں کا جائزہ لیا گیا۔
اجلاس میں محکمہ وائلڈ لائف حکام نے بتایا کہ رانو ریچھ کو منتقل کرنے کے لیے مقررہ سائز کا آہنی پنجرہ تیار کر لیا گیا ہے۔
حکام کا کہنا تھا کہ ریچھ کو ٹریننگ کے ذریعے اس پنجرے میں اپنی مرضی سے آنا جانا سکھایا جائے گا تاکہ منتقلی کے دوران دباؤ یا خطرہ کم سے کم ہو۔
چیف سیکرٹری سندھ نے ہدایت کی کہ سندھ کے کسی بھی چڑیا گھر کے لیے غیر مقامی (ایگزاٹک) جانور نہ خریدے جائیں۔
انہوں نے مزید کہا کہ ایگزاٹک جانوروں کی خریداری پر مکمل پابندی کے لیے سمری تیار کی جائے۔
محکمہ وائلڈ لائف کے مطابق رانو ریچھ کو جلد گلگت بلتستان کے قدرتی ماحول میں منتقل کر دیا جائے گا، جہاں اس کی بہتر دیکھ بھال اور آزادانہ زندگی ممکن ہوگی