کرس براڈ نے عالمی کرکٹ میں بھارت کی من مانیوں کا پول کھول دیا

آئی سی سی کے سابق میچ ریفری کرس براڈ نے عالمی کرکٹ میں بھارت کی من مانیوں کا پول کھول دیا ہے۔
آئی سی سی کے سابق میچ ریفری کرس براڈ نے برطانوی اختار ٹیلیگراف کو انٹرویو دیتے ہوئے انٹرنیشنل کرکٹ میں بھارت کی من مانیوں کا پھول کھول دیا اور کہا کہ بھارت نے پیسے کے بل بوتے پر عالمی کرکٹ کو تباہ کر دیا ہے۔
کرس براڈ نے بھارت اور آئی سی سی کا گٹھ جوڑ بے نقاب کرتے ہوئے بتایا کہ بھارت نے مکمل طور پر آئی سی سی کو کنٹرول کر لیا ہے، جس کے بعد کھیل میں سیاست آ گئی ہے۔
انہوں نے انکشاف کیا کہ ایک میچ میں بھارتی ٹیم اوور ریٹ میں چار اوورز پیچھے تھی اور اس پر جرمانہ یقینی بنتا تھا۔ لیکن فون آیا اور کہا گیا کوئی حل نکالو اور قواعد وضوابط پر ہلکا ہاتھ رکھا جائے، کیونکہ یہ بھارت ہے۔
کرس براڈ نے کہا کہ کال موصول ہونے کے بعد ٹائم کیلکولیشن سے رعایت نکالی۔ اگلے میچ میں بھی اوور ریٹ کا مسئلہ ہوا، تو پھر کال کر کے کہا گیا کہ صرف گنگولی (اس وقت کے بھارتی کپتان) کو سزا دیں۔
سابق میچ ریفری نے کہا کہ آج کرکٹ کے کھیل میں کافی سیاست شامل ہو چکی ہے اور اب سیاسی پیچیدگی سمجھ کر ہی فیصلے ہوتے ہیں۔ مطمئن ہوں کہ اب میں آئی سی سی میچ آفیشلز کے پینل کا حصہ نہیں ہوں۔
واضح رہے کہ یو اے ای میں کھیلے گئے حالیہ ایشیا کپ کے دوران پر میچ ریفری اینڈی پائی کرافٹ نے بھارتی بورڈ کی ہدایت پر عمل کرتے ہوئے پاکستانی کپتان سلمان علی آغا کو بھارتی ہم منصب سے ہاتھ ملانے سے روکا تھا، پھر یہ سلسلہ پورے ٹورنامنٹ میں جاری رہا۔ بلکہ اس ایونٹ میں امپائرز نے کئی پاکستان مخالف اور بھارت کے حق میں فیصلے بھی دیے