بیرون ملک سے آنے والی فیملیز کو لوٹنے والے گروہ کے کارندے گرفتار

کراچی (28 اکتوبر 2025): گارڈن کے علاقے سے انتہائی مطلوب گینگ کے دو کارندے گرفتار کیے ہیں جو بیرون ملک سے آنے والی فیملیز کو لوٹتے تھے۔
رہنما نیوز کے مطابق اسپیشل انویسٹی گیشن یونٹ (ایس آئی یو) نے کراچی کے علاقے گارڈن میں خفیہ اطلاع پر چھاپہ مار کر انتہائی مطلوب گینگ کے 2 کارندے گرفتار کر لیے ہیں۔
گرفتار ملزمان حماد اور حیدر رضوی بیرون ملک سے آنے والی فیملیز کو لوٹتے تھے۔ ان کے قبضہ سے اسلحہ، مسروقہ موبائل فون برآمد کیا گیا ہے۔
اسپیشل انویسٹی گیشن یونٹ کے ایس ایس پی امجد شیخ نے ملزمان سے متعلق تفصیلات بتاتے ہوئے کہا کہ ملزمان ایئرپورٹ سے آنے والی فیملیز کی ریکی کرتے تھے اور ان سے قیمتی موبائل فون، زیورات اور نقدی لوٹتے تھے۔ لوٹ مار کی وارداتوں کے دوران گرفتار ملزمان کیپ اور ٹی شرٹ کے ساتھ کرائے کی کار استعمال کرتے تھے۔
ایس ایس پی نے کہا کہ ملزمان نے تفتیش کے دوران اہم انکشافات کرتے ہوئے بتایا ہے کہ انہوں نے رواں سال بیرون ملک سے آنے والی فیملی سے لوٹ مار کی اور اس فیملی سے طلائی زیورات، 2 ہزار پاؤنڈ اور موبائل فون چھینے۔ اس کے علاوہ تیموریہ کے علاقے میں فیملی سے موبائل فون اور 220 یورو چھینے تھے۔
امجد شیخ نے بتایا کہ ملزمان نے 2022 میں ناگن چورنگی پر شہری سے قیمتی موبائل فون اور 20 ہزار روپے نقدی اور اسی سال فائیو اسٹار چورنگی پر کار سوار فیملی سے موبائل فون اور نقدی لے اڑے تھے۔ اس کے علاوہ کے ڈی اے چورنگی پر خاتون سے موبائل اور نقدی چھینی تھی۔
انہوں نے کہا کہ گرفتار ملزمان پر ڈکیتی اور لوٹ مار کے کئی مقدمات درج ہیں اور ان کے دیگر ساتھیوں کی گرفتاری کے لیے چھاپے مارے جا رہے ہیں۔