7 براعظم کی 7 بلند ترین چوٹیاں سر، پاکستانی کوہ پیما کا تاریخی کارنامہ

اسلام آباد (28 اکتوبر 2025): پاکستان کے جانباز کوہ پیما نے سات براعظم کی 7 بلند ترین چوٹیاں سر کر کے سیون سمٹس چیلنج مکمل کر لیا۔
دنیا میں سات براعظم ہیں اور ہر براعظم میں بڑے بڑے پہاڑ ہیں، جن کو سر کرنا آسان نہیں، لیکن جذبے جواں ہو تو پھر بلند ترین چوٹیاں بھی ریت کے ذرے بن جاتی ہیں۔
ایسے ہی ایک جاں باز کوہ پیما پاکستان کے اسد علی میمن ہیں، جنہوں نے ہر براعظم کی بلند ترین چوٹی سر کر کے عالمی ’’سیون سمٹس چیلنج‘‘ مکمل کر لیا۔
اسد علی جنہوں نے اپنے اس تاریخی لیکن پُر خطر سفر کا آغاز 2019 میں یورپ کی بلند ترین چوٹی ماؤنٹ البرس سر کر کے کیا تھا۔ صرف 6 سال میں ساتوں براعظم میں سات چوٹیاں سر کر کے یہ چیلنج مکمل کیا۔
پاکستانی کوہ پیما نے 2019 میں یورپ کی ماؤنٹ البرس، 2020 میں جنوبی امریکا کی اکونکاگوا، 2021 میں افریقہ کی کیلیمنجرو، 2022 میں شمالی امریکا کی ماؤنٹ ڈینالی سر کیں۔
اسد علی نے 2023 میں ایشیا کی بلند ترین چوٹی ماؤنٹ ایورسٹ، رواں برس کے آغاز میں برف پوش براعظم انٹارکٹیکا کی بلند ترین چوٹی ماؤنٹ ونسن اور اب اوشیانا کی چوٹی نے اس تاریخی سفر کو مکمل کیا۔