سندھ حکومت کے بڑے اعلانات!

سندھ حکومت صوبے بھر کے لیے اہم فیصلے کرتے ہوئے کئی بڑے منصوبوں کا اعلان کر دیا ہے۔
سندھ حکومت نے کراچی سمیت اندرون صوبہ کے لیے اسکوٹی ٹریننگ پروگرام، پیپلز بس سروس، بی آر ٹی، ای وی بسز اور ٹیکسی سے متعلق اہم اعلان کیے ہیں۔
اے آر وائی نیوز کے مطابق سندھ کے سینئر وزیر شرجیل انعام میمن کی زیر صدارت محکمہ ٹرانسپورٹ کا اہم اجلاس ہوا جس میں محکمہ ٹرانسپورٹ و ماس ٹرانزٹ کے جاری اور آئندہ منصوبوں پر تفصیلی تبادلہ خیال کیا گیا۔
اجلاس میں خواتین اور طالبات کے لیے حیدرآباد، سکھر اور لاڑکانہ میں اسکوٹی ٹریننگ پروگرام شروع کرنے کا اعلان کیا گیا، اس کے ساتھ ہی پیپلز بس سروس کو سندھ کے مزید تین اضلاع میں تک وسعت دینے کا فیصلہ بھی کیا گیا۔
کراچی میں گلشن معمار اور اطراف کے رہائشیوں کی سہولت کے لیے معمار سے ٹاور تک 15 ای وی بسز کا نیا روٹ شروع کرنے اور یلو لائن بی آر ٹی کے اہم حصے تاج حیدر پل کو عوام کے لیے کھولنے کے فیصلے بھی کیے گئے۔
اجلاس سے خطاب کرتے ہوئے شرجیل میمن نے کہا کہ سندھ حکومت خواتین کو با اختیار بنانے کے لیے عملی اقدامات کر رہی ہے۔ حیدرآباد، سکھر اور لاڑکانہ میں خواتین اور طالبات کو نجی کمپنی کے اشتراک سے اسکوٹی چلانے کی تربیت دی جائے گی۔ تربیت کی تکمیل پر انہیں مفت ڈرائیونگ لائسنس بھی جاری کیے جائیں گے۔
صوبائی وزیر نے بتایا کہ گلشن معمار سے ٹاور تک پندرہ ای وی بسوں پر مشتمل نیا روٹ شروع کیا جا رہا ہے جب کہ پیپلز بس سروس کو خیرپور، شکارپور اور نوشہرو فیروز اضلاع تک وسعت دی جا رہی ہیں، جہاں مجموعی طور پر بیس نئی پیپلز بسیں چلائی جائیں گی۔
ان کا کہنا تھا کہ ڈبل ڈیکر اور ای وی بسوں کی نئی کھیپ جلد کراچی پہنچنے والی ہے جب کہ دسمبر میں ای وی ٹیکسی سروس کا آغاز بھی کر دیا جائے گا۔