کپتان نے جنوبی افریقہ سے شکست کی بڑی وجہ بتا دی

راولپنڈی- پاکستان ٹیسٹ ٹیم کے کپتان شان مسعود نے جنوبی افریقہ سے دوسرے ٹیسٹ میں شکست کی بڑی وجہ بتا دی۔
پنڈی میں کھیلے گئے دوسرے ٹیسٹ میں جنوبی افریقہ نے پاکستان کو 8 وکٹوں سے شکست دے کر دو میچوں کی سیریز ایک، ایک سے برابر کر دی۔ اس میچ میں شکست کے بعد پاکستان ٹیم آئی سی سی کی ٹیسٹ چیمپئن شپ کی پوائنٹس ٹیبل پر دوسری پوزیشن سے گر کر پانچویں نمبر پر پہنچ گئی ہے۔
میچ کے بعد اس شکست پر پاکستانی کپتان شان مسعود کا کہنا تھا کہ ہم نے ہوم گراؤنڈ پر رواں برس 6 میں سے 4 میچ جیتے ہیں، بقیہ دو میچز بھی جیت سکتے تھے۔
شان مسعود کا کہنا تھا کہ پہلی اننگ میں جنوبی افریقہ کی دو وکٹیں بھاری پڑ گئیں۔ مستقبل میں ان خامیوں پر قابو پانا ہوگا۔
اس سے قبل پاکستان ٹیم کے بولنگ کوچ اظہر محمود قومی ٹیم کی کارکردگی پر برس پڑے اور ان کا کہنا تھا کہ کوالٹی ٹیم کو موقع دیں گے تو جارحانہ جواب ملے گا۔ ہماری ٹیم کو اسپنرز کے خلاف اچھی بیٹنگ کرنا سیکھنا ہوگی، بیٹرز کو اسٹرائیک روٹیٹ کرنا چاہیے تھا۔
ان کا کہنا تھا کہ پاکستان ٹیم نے کیچ ڈراپ کیے، بیٹنگ کولیپس ہوئی۔ انٹرنیشنل کرکٹ میں کرکٹر کو دماغی طور پر مضبوط ہونا اور اسکور کرنے کا طریقہ معلوم ہونا چاہیے۔