پاکستان جونیئر ہاکی ٹیم کو بھارت نہ بھیجنے کا فیصلہ

پاکستان کی جونیئر ہاکی ٹیم ورلڈکپ میں شرکت کےلیے بھارت جائے گی یا نہیں، حکومت نے اعلیٰ سطحی اجلاس کے بعد بڑا فیصلہ کرلیا۔
حکومت نے پاکستان جونیئر ہاکی ٹیم کو بھارت نہ بھیجنے کا فیصلہ کیا ہے، فیصلہ اعلیٰ سطح کے مشاورتی اجلاس کے بعد سامنے آیا ہے، پاکستان ہاکی فیڈریشن نے انٹرنیشنل ہاکی فیڈریشن کو حکومتی فیصلے سے آگاہ کردیا ہے۔
پاکستانی کھلاڑیوں کی سیکیورٹی کے پیش نظر یہ فیصلہ کیا گیا ہے، جونیئر ہاکی ورلڈ کپ 28 نومبر سے بھارت میں کھیلا جانا ہے۔
اس سے قبل اسی سال منعقد ہونے ولاے ایشیا ہاکی کپ میں گرین شرٹس نے شرکت نہیں کی تھی اور پاکستان ہاکی ٹیم ایونٹ سے دستبردار ہوگئی تھی۔
پاک بھارت کشیدگی کے باعث پڑوسی ملک کی میزبانی میں ہونے والے ایشیا کپ میں پاکستانی ٹیم کو حکومت نے نہ بھیجنے کا فیصلہ کیا تھا۔
ذرائع کا کہنا تھا کہ پاکستان ہاکی فیڈریشن نے ٹیم کو بھارت بھیجنے کے لیے حکومت سے کلیئرنس مانگی تھی۔ تاہم حکومت نے این او سی دینے سے انکار کر دیا تھا۔