اسرائیل کے حملے نے امریکی دفاعی معاہدے کی تجدید کی ضرورت کو بڑھا دیا:قطر

قطر کا کہنا ہے کہ اسرائیل کے حملے نے امریکی دفاعی معاہدے کی تجدید کی ضرورت کو بڑھا دیا ہے۔
قطر کی وزارت خارجہ کے ترجمان ماجد الانصاری کا کہنا ہے کہ قطر کے امیر شیخ تمیم بن حمد الثانی نے دوحا میں امریکی وزیر خارجہ مارکو روبیو کی میزبانی کی ہے۔
اس ملاقات کے بارے میں انہوں نے کیا کہا اس کا خلاصہ یہ ہے:
دوطرفہ تعلقات اور قطر اور امریکا کے درمیان اسٹریٹجک شراکت داری پر تبادلہ خیال کیا گیا۔ قطر پر اسرائیل کے حملے نے قطر اور امریکا کے درمیان نئے دفاعی معاہدے کی ضرورت کو تیز کر دیا ہے۔
قطر کے امریکا کے ساتھ تعلقات اسٹریٹجک ہیں، خاص طور پر دفاعی سطح پر، اور یہ اس دورے کے دوران ہونے والی بات چیت کا حصہ تھا۔
قطر اپنی خودمختاری کا دفاع کرنے اور کسی بھی حملے کی تکرار کو روکنے کے لیے اقدامات کرنے کے لیے پرعزم ہے۔
ان رپورٹوں کے بارے میں جب ان سے پوچھا گیا کہ حملے سے 50 منٹ قبل امریکا کو مطلع کیا گیا تھا، الانصاری نے کہا کہ ہم میڈیا رپورٹس سے نہیں نمٹتے ہم امریکا کے ساتھ اپنے براہ راست رابطے رکھتے ہیں۔
قطر نے پہلے کہا تھا کہ اسے اسرائیلی حملے کی اطلاع اس کے شروع ہونے کے 10 منٹ بعد دی گئی۔