ایشین کرکٹ کونسل (اے سی سی) نے میچ ریفری اینڈی پائی کرافٹ کے خلاف تحقیقات مکمل کرلیں۔
ذرائع کا کہنا ہے کہ میچ ریفری اینڈی پائی کرافٹ نے جان بوجھ کر ہاتھ ملانے سے روکا، انہوں نے بھارت کے ساتھ مل کر کام کیا۔
میچ ریفری نے ٹاس کے وقت سلمان علی آغا کو مائیک بند کرکے بات سننے کا کہا تھا۔
سوریا کمار کو بچانے کے لیے میچ ریفری نے آپریشن سندور بولنے پر کارروائی سے گریز کیا، قوانین کے مطابق میچ ریفری کو منیجر کے ذریعے پیغام دینا ہوتا ہے۔
واضح رہے کہ بھارتی میڈیا کے دعوے کے مطابق انٹرنیشنل کرکٹ کونسل نے میچ ریفری اینڈی پائی کرافٹ کو ایشیا کپ سے ہٹانے کا پاکستان کرکٹ بورڈ کا مطالبہ مسترد کر دیا ہے، تاہم پاکستان کے میچز سے پائکرافٹ کی تبدیلی ہو سکتی ہے، اس سلسلے میں آئی سی سی نے اپنے فیصلے سے پی سی بی کو بھی آگاہ کر دیا ہے۔
بھارتی میڈیاکا کہنا ہے کہ میچ ریفری اینڈی پائکرافٹ کا معاملہ سلجھانے کے لیے درمیانی راستہ نکالنے کی کوشش کی جا رہی ہے، اور پورے ایشیا کپ کی بجائے صرف پاکستان کے میچز سے پائی کرافٹ کو ہٹانے کی تجویز دی گئی ہے۔ اینڈی ایشیا کپ میں تو رہیں گے لیکن پاکستان کے میچز میں میچ ریفری کے فرائض انجام نہیں دیں گے۔
بھارتی میڈیا رپورٹس کے مطابق آئی سی سی نے پی سی بی کو بھی فیصلے سے آگاہ کر دیا ہے، پاکستان کے میچز میں پائی کرافٹ کی جگہ رچی رچرڈسن کو میچ ریفری لگائے جانے کا امکان ہے۔
اس ایونٹ میں پاکستان اپنا تیسرا میچ کل یو اے ای کے خلاف کھیلے گا۔ یاد رہے کہ ایشیا کپ میں پاک بھارت میچ کے دوران ٹاس کے وقت اینڈی پائی کرافٹ نے پاکستان کے کپتان سلمان آغا سے کہا تھا کہ ٹاس کے موقع پر شیک ہینڈ نہیں ہوگا، اینڈی پائی کرافٹ نے اس سے قبل پاکستانی میڈیا مینجر سے کہا تھا کہ یہ سب ریکارڈ نہیں ہونا چاہیے۔
