گلگت بلتستان میں حکومت سازی کے لیے سیاسی سرگرمیوں میں تیزی آ گئی ہے اور مختلف جماعتوں کے درمیان رابطوں اور مشاورت کا سلسلہ جاری ہے۔
ذرائع کے مطابق پاکستان پیپلز پارٹی نے حکومت کی تشکیل کے لیے مختلف سیاسی جماعتوں سے رابطے شروع کر دیے ہیں۔ اسی سلسلے میں پیپلز پارٹی نے مجلس وحدت مسلمین (ایم ڈبلیو ایم) سے بھی رابطہ کیا ہے اور انہیں حکومت میں شمولیت کی دعوت دی ہے۔
ذرائع کا کہنا ہے کہ پیپلز پارٹی نے گلگت بلتستان میں مستحکم حکومت کے قیام کے لیے ایم ڈبلیو ایم کو ساتھ چلنے کی پیشکش کی ہے، تاہم مجلس وحدت مسلمین کی جانب سے تاحال اس حوالے سے کوئی مثبت جواب سامنے نہیں آیا۔
سیاسی رابطوں کے دوران اہم مشاورت بھی جاری ہے۔ ذرائع کے مطابق مجلس وحدت مسلمین کے سربراہ علامہ راجہ ناصر عباس نے بیرسٹر گوہر سے رابطہ کیا اور انہیں پیپلز پارٹی کی جانب سے ہونے والی پیش رفت سے آگاہ کیا۔
ذرائع کے مطابق علامہ راجہ ناصر عباس نے حکومت سازی کے حوالے سے ہونے والے رابطوں اور ممکنہ سیاسی اتحادوں پر بھی تبادلہ خیال کیا۔ گلگت بلتستان میں حکومت کی تشکیل کے لیے مختلف سیاسی جماعتوں کے درمیان مشاورت کا عمل تاحال جاری ہے۔
