کراچی: ڈاکٹر آکاش قتل کیس میں گرفتار تینوں ملزمان پولیس کارروائی کے دوران ہلاک ہو گئے۔
اسپیشل انویسٹی گیشن یونٹ (ایس آئی یو) کے مطابق گلشنِ معمار کے علاقے عمر بروہی گوٹھ میں گرفتار ملزمان کی نشاندہی پر ان کے فرار ساتھیوں کی گرفتاری کے لیے چھاپہ مارا گیا، جہاں مبینہ طور پر ملزمان کے ساتھیوں نے پولیس پر فائرنگ کر دی۔
ایس آئی یو کا کہنا ہے کہ فائرنگ کے تبادلے میں ایک پولیس اہلکار زخمی ہوا، جبکہ گرفتار تینوں ملزمان اپنے ہی ساتھیوں کی فائرنگ کی زد میں آ کر ہلاک ہو گئے۔
ڈاکٹر آکاش قتل کیس کا پس منظر
یاد رہے کہ 13 جولائی کو کراچی کے علاقے کلفٹن میں بینک کے باہر ڈکیتی کے دوران ڈاکوؤں کی فائرنگ سے نوجوان ڈاکٹر آکاش جاں بحق ہو گئے تھے، جبکہ ملزمان بینک سے نکالی گئی 50 لاکھ روپے کی رقم میں سے 25 لاکھ روپے لوٹ کر فرار ہو گئے تھے۔
بعد ازاں پولیس نے کیس کی تفتیشی رپورٹ جوڈیشل مجسٹریٹ جنوبی کی عدالت میں جمع کرائی، جس میں واردات میں ایک نامعلوم خاتون کے مبینہ کردار کا بھی انکشاف کیا گیا تھا۔ پولیس کے مطابق گرفتار ملزمان بینکوں کے باہر شہریوں سے نقدی چھیننے اور تاجروں سے لوٹ مار کی متعدد وارداتوں میں بھی ملوث تھے۔
