پاکستان مسلم لیگ (ن) اور پاکستان پیپلز پارٹی کی قیادت کے درمیان ہونے والی ملاقات میں وفاق اور صوبوں کے ترقیاتی پروگراموں میں کٹوتی پر اتفاق کر لیا گیا ہے، جس کے بعد وفاقی بجٹ 2026-27 کی منظوری کی راہ مزید ہموار ہو گئی ہے۔
صدرِ مملکت آصف علی زرداری نے قومی اسمبلی کا اجلاس آج شام 5 بجے جبکہ سینیٹ کا اجلاس شام 4 بجے طلب کرنے کی منظوری دے دی ہے۔ ذرائع کے مطابق وفاقی حکومت نے آئندہ مالی سال کے مجوزہ ترقیاتی پروگرام میں 126 ارب روپے کی کمی کر دی ہے۔ اس کے علاوہ بلوچستان کے سوا دیگر تینوں صوبے بھی اپنے ترقیاتی اخراجات میں کٹوتی کریں گے۔
ذرائع کا کہنا ہے کہ وفاق اور صوبوں کی جانب سے مجموعی طور پر 500 ارب روپے کی بچت حاصل کی جائے گی، جسے اسٹریٹجک اہمیت کے حامل منصوبوں کی تکمیل پر خرچ کیا جائے گا۔ وفاقی وزیر منصوبہ بندی احسن اقبال نے بھی وفاقی ترقیاتی پروگرام، جس کا حجم ایک ہزار 126 ارب روپے ہے، میں 126 ارب روپے کی کٹوتی کی تصدیق کی ہے۔
ذرائع کے مطابق وفاق نے قابل تقسیم محاصل میں صوبوں سے تقریباً 1200 ارب روپے اضافی وسائل طلب کیے تھے، جن میں پنجاب سے 650 ارب، سندھ سے 300 ارب، خیبرپختونخوا سے 180 ارب اور بلوچستان سے 110 ارب روپے شامل تھے۔ تاہم بلوچستان کے ترقیاتی پروگرام میں کوئی کمی نہیں کی جائے گی، کیونکہ صوبے کے لیے 308 ارب روپے مختص کرنے کی تجویز دی گئی ہے، جو رواں مالی سال کے مقابلے میں پہلے ہی 53 ارب روپے کم ہے۔
