مہورہ عملکوٹ میں گاڑی پر فائرنگ کے نتیجے میں 5 افراد جاں بحق ہوگئے

کرم : مہورہ عملکوٹ میں گاڑی پر فائرنگ کے نتیجے میں 5 افراد جاں بحق ہوگئے تاہم جاں بحق ہونے والوں کی لاشیں تحصیل ہیڈ کوارٹر اسپتال صدہ منتقل کر دی گئی ہیں۔
تفصیلات کے مطابق کرم کے علاقے لوئر کرم مہورہ میں نامعلوم افراد نے ایک گاڑی پر فائرنگ کر دی ، جس کے نتیجے میں 5 افراد جاں بحق ہو گئے۔
پولیس ذرائع نے بتایا واقعہ بدھ کے روز پیش آیا، جب گاڑی داراڈر سے صدہ جا رہی تھی۔ جاں بحق ہونے والوں کی لاشیں تحصیل ہیڈ کوارٹر اسپتال صدہ منتقل کر دی گئی ہیں۔
پولیس کی بھاری نفری جائے وقوعہ پر پہنچ گئی ہے اور علاقے کو گھیرے میں لے کر تحقیقات شروع کر دی گئی ہیں۔
خیال رہے کہ رواں سال جون میں بھی اپر کرم میں ایک چیک پوسٹ پر دہشتگرد حملے کے دوران دو پاکستانی فوجی شہید اور آٹھ زخمی ہوئے تھے۔ حملہ آور افغانستان کے صوبہ ننگرہار سے بھاری ہتھیاروں کے ساتھ داخل ہوئے تھے۔ مقامی افراد نے مسجد کے لاؤڈ اسپیکر پر اعلانات کے بعد سیکیورٹی فورسز کا ساتھ دیا اور ایک دہشتگرد کو زندہ پکڑ لیا گیا تھا، جس نے انکشاف کیا تھا کہ انہیں طالبان کی جانب سے اسلحہ فراہم کیا گیا تھا۔
کرم کا علاقہ طویل عرصے سے پرتشدد واقعات کی لپیٹ میں ہے۔ مقامی قبائل کی پرانی دشمنیوں کے ساتھ ساتھ بیرونی عناصر بھی علاقے کو نشانہ بناتے رہے ہیں۔ رواں سال فروری میں سیکیورٹی فورسز نے اوچت علاقے میں ایک ریلیف قافلے پر حملے میں ملوث 11 شدت پسندوں کو گرفتار کیا تھا۔