ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان، سعودی عرب اور ترکیہ کے درمیان مکہ جوائنٹ ڈیفنس ایگریمنٹ کا مقصد علاقائی استحکام اور مشترکہ دفاع کو یقینی بنانا ہے، اس کے کوئی جارحانہ یا علاقائی عزائم نہیں۔
عربی میڈیا کے پروگرام گلوبل نیوز ٹوڈے میں گفتگو کرتے ہوئے انہوں نے واضح کیا کہ معاہدے میں اسے مسلم اتحاد یا صرف مسلم ممالک کے لیے قائم سکیورٹی ڈھانچہ قرار دینے کی کوئی شق موجود نہیں۔ ان کا کہنا تھا کہ اگر تینوں میں سے کسی ایک ملک پر حملہ ہوتا ہے تو ردعمل کا طریقہ کار شراکت دار ممالک باہمی مشاورت سے طے کریں گے،
تاہم دفاعی معاہدوں کی عملی تفصیلات عوام کے سامنے نہیں لائی جاتیں۔ ڈی جی آئی ایس پی آر نے کہا کہ پاکستان، سعودی عرب اور ترکیہ کے درمیان دفاعی تعاون چین کے ساتھ اسلام آباد کے تعلقات سے متصادم نہیں بلکہ دونوں ممالک کے تعلقات کو مزید مضبوط اور معاون بنانے والا ہے۔ انہوں نے واضح کیا کہ معاہدے کا مقصد خطے میں امن اور استحکام برقرار رکھنا ہے۔
