وزیراعظم شہباز شریف نے مکہ المکرمہ پر ڈرون حملے کی کوشش کی شدید مذمت کرتے ہوئے اسے ناقابلِ معافی قرار دیا ہے۔ سوشل میڈیا پر جاری بیان میں وزیراعظم نے کہا کہ مسجدِ حرام کے مقدس مقام پر حملے کی بزدلانہ کوشش پر پاکستانی عوام شدید دکھ اور تشویش میں مبتلا ہیں۔
انہوں نے سعودی مسلح افواج کی بروقت کارروائی اور پیشہ ورانہ صلاحیتوں کو خراجِ تحسین پیش کرتے ہوئے کہا کہ حرمین شریفین کے تحفظ کے لیے پوری قوم سعودی عرب کے شانہ بشانہ کھڑی ہے۔ وزیراعظم نے تمام فریقین سے زیادہ سے زیادہ تحمل کا مظاہرہ کرنے اور مزید کشیدگی سے گریز کی اپیل کرتے ہوئے کہا کہ خطہ پہلے ہی تنازعات کی بھاری قیمت ادا کرچکا ہے، پائیدار امن کے لیے مذاکرات اور سفارت کاری ہی واحد قابلِ عمل راستہ ہیں۔ انہوں نے سعودی عرب کی خودمختاری، علاقائی سالمیت اور حرمین شریفین کی سلامتی و تقدس کے تحفظ کے لیے پاکستان کے غیرمتزلزل عزم کا اعادہ بھی کیا۔
