لاہور: پنجاب حکومت نے محرم الحرام کے دوران امن و امان برقرار رکھنے اور سکیورٹی خدشات کے پیش نظر صوبے بھر میں دفعہ 144 نافذ کر دی ہے۔ محکمہ داخلہ پنجاب کی جانب سے جاری نوٹیفکیشن کے مطابق دفعہ 144 کا نفاذ 17 جون سے 26 جون تک برقرار رہے گا۔
نوٹیفکیشن کے مطابق محرم الحرام کے دوران صرف منظور شدہ جلوسوں اور مجالس کی اجازت ہوگی، جبکہ عوامی مقامات پر ہر قسم کے ہتھیاروں اور آتش گیر مواد کی نمائش پر پابندی عائد کر دی گئی ہے۔
حکومت نے فرقہ وارانہ ہم آہنگی برقرار رکھنے کے لیے اشتعال انگیز نعروں، اشاروں، بیانات اور تبصروں پر بھی پابندی لگا دی ہے۔ اسی طرح جلوسوں کے راستوں پر واقع گھروں اور عمارتوں کی چھتوں پر مورچے بنانے کی اجازت نہیں ہوگی۔
نوٹیفکیشن کے مطابق جلوس کے راستوں میں واقع عمارتوں کی چھتوں پر پتھر، اینٹیں، بوتلیں یا دیگر اشیاء جمع کرنے پر بھی پابندی ہوگی۔ اس کے علاوہ جلوسوں کے دوران راستوں میں واقع عمارتوں کی چھتوں اور دکانوں کے تھڑوں پر بطور تماشائی موجود رہنے کی بھی اجازت نہیں ہوگی۔
محکمہ داخلہ کے مطابق بیشتر پابندیوں کا اطلاق یکم سے 10 محرم الحرام تک ہوگا، جبکہ ڈبل سواری پر پابندی 9 اور 10 محرم کو نافذ رہے گی۔ تاہم بزرگ شہریوں، خواتین اور قانون نافذ کرنے والے اداروں کے اہلکاروں کو اس پابندی سے استثنا حاصل ہوگا۔
