اسلام آباد (9 اکتوبر 2025): وزیر اعظم شہباز شریف نے اقوام متحدہ کی جنرل اسمبلی میں شرکت کے دوران انوکھا اعزاز حاصل کر لیا جبکہ امریکی صدر ڈونلڈ ٹرمپ دوسرے نمبر پر رہے۔
سرکاری خبر رساں ادارے اے پی پی کے مطابق وزیر اعظم شہباز شریف کی اقوام متحدہ کی جنرل اسمبلی سے خطاب کی ویڈیو اقوام متحدہ کے یوٹیوب چینل پر دنیا بھر کے رہنماؤں میں سب سے زیادہ دیکھی جانے والی ویڈیو بن گئی ہے۔
وزیر اعطم شہباز شریف کی ویڈیو کو 26 ستمبر 2025 کو یوٹیوب پر اپ لوڈ کیے جانے کے بعد سے اب تک 13 لاکھ (1.3 ملین) سے زائد مرتبہ دیکھا جا چکا ہے جبکہ دوسرے نمبر پر امریکی صدر ڈونلڈ ٹرمپ کا 23 ستمبر 2025 کا خطاب اب تک 4 لاکھ 58 ہزار بار دیکھا جا چکا ہے۔
تیسرے نمبر پر تھائی لینڈ کے وزیر خارجہ سہاسک فوانگ کیت کیوکا خطاب ہے جسے 27 ستمبر 2025 کے بعد سے 2 لاکھ 77 ہزار بار دیکھا گیا ہے۔
وزیر اعظم شہباز شریف نے اپنے جامع خطاب میں بھارت کے غیر قانونی زیر تسلط جموں و کشمیر کے مسئلے، غزہ کی صورتحال، ماحولیاتی تبدیلی اور عالمی معاشی بحران پر بات کی تھی۔
انہوں نے ان امور کو ایک ایسے پیچیدہ اور چیلنجنگ عالمی منظر نامے کا حصہ قرار دیا جو بڑھتے ہوئے تنازعات، بین الاقوامی قوانین کی خلاف ورزی اور ماحولیاتی عدم استحکام سے دوچار ہے۔
پاکستانی وزیر اعظم نے غزہ میں اسرائیلی جارحیت کی شدید مذمت کی اور فوری اور مستقل جنگ بندی کا مطالبہ کیا۔ انہوں نے اسرائیلی کارروائیوں کو معصوم لوگوں کا منظم قتل عام اور دنیا کے ضمیر پر دھبہ قرار دیا تھا۔
شہباز شریف نے 1967 سے قبل کی سرحدوں پر مبنی دو ریاستی حل کی حمایت کی جس میں مشرقی بیت المقدس کو آزاد فلسطینی ریاست کا دارالحکومت قرار دیا جائے۔
وزیر اعظم شہباز شریف نے مسئلہ کشمیر پر پاکستان کے مؤقف کا اعادہ کرتے ہوئے اقوامِ متحدہ کی سلامتی کونسل کی قراردادوں کے مطابق کشمیری عوام کو حقِ خودارادیت دینے کی ضرورت پر زور دیا۔ انہوں نے بھارت پر غیر قانونی اور یکطرفہ اقدامات کرنے کا الزام عائد کیا جو خطے میں کشیدگی کو بڑھا رہے ہیں۔
