اسلام آباد (9 اکتوبر 2025): منگلا ڈیم اپنی پوری صلاحیت کے مطابق مکمل بھر گیا جس میں پانی کی سطح 1242 فٹ ریکارڈ کی گئی۔
واٹر اینڈ پاور ڈیولپمنٹ اتھارٹی (واپڈا) کے مطابق منگلا ڈیم میں قابل استعمال پانی کا ذخیرہ 72 لاکھ 77 ہزار ایکڑ فٹ ہے جبکہ تربیلا اور چشمہ ڈیم پہلے ہی مکمل بھر چکے ہیں، تینوں آبی ذخائر میں پانی کا مجموعی ذخیرہ ایک کروڑ 33 لاکھ 16 ہزار ایکڑ فٹ ہے۔
واپڈا نے بتایا کہ پانی کی یہ مقدار زرعی شعبے اور پن بجلی کی پیداوار کیلیے خوش آئند ہے، منگلا ڈیم پاکستان کا سب سے بڑا آبی ذخیرہ ہے، یہ چھ دہائیوں سے ملکی معیشت میں اہم کردار ادا کر رہا ہے۔
اتھارٹی کے مطابق واپڈا منگلا ریفربشمنٹ پراجیکٹ پر عملدرآمد کر رہا ہے، اس کی تکمیل پر بجلی پیداوار 1000 سے بڑھ کر 1310 میگاواٹ ہو جائے گی۔
واضح رہے کہ مارچ میں آبی ذخائر میں پانی کی سطح ڈیڈ لیول پر پہنچ گئی تھی جبکہ منگلا ڈیم سے سستی پن بجلی کی پیداوار بند ہوگئی تھی۔
واپڈا نے بتایا تھا کہ منگلا ڈیم ڈیڈ لیول پر پہنچ چکا ہے جبکہ تربیلا ڈیم ڈیڈ لیول سے 2 فٹ اور چشمہ ایک فٹ اوپر ہے، پانی نہ ہونے کے سبب منگلا ڈیم سے بجلی کی پیداوار بھی رک گئی۔
تربیلا ڈیم میں پانی کی سطح 1404.93 فٹ تھی، اس کا کم از کم آپریٹنگ لیول 1402 فٹ تھا اور پانی ذخیرہ کرنے کی انتہائی سطح 1550 فٹ تھی۔
