ٹریفک پولیس کے ای چالان میں سنگین خامیاں، گھر بیٹھے شخص کا چالان کردیا

کراچی: ٹریفک پولیس کے الیکٹرانک چالان کے آغاز میں ہی سنگین خامیاں سامنے آگئی ہیں، جسے چالان بھیجا گیا وہ شخص بےقصور نکلا۔
تفصیلات کے مطابق ای چالان کے ذریعے شہریوں کو ٹریفک قوانین کی خلاف ورزی سے روکنے کی پالیسی آغاز میں ہی مسائل کا شکار نظر آرہی ہے، ٹریفک پولیس کی جانب سے نمبر پلیٹ کی بنیاد پر بھیجا گیا چالان متاثرہ شہری کا نکلا ہی نہیں۔
چالان پر نمبر پلیٹ کی تصویر الگ جبکہ انگلش حرف تہجی میں لکھے نمبر بھی الگ ہیں، موٹرسائیکل کے دونوں نمبروں کے کوائف بالکل علیحدہ علیحدہ ہیں۔
مذکورہ چالان 27 اکتوبر صبح پونے 10 بجے اور مقام تین تلوار کلفٹن کا دکھایا گیا ہے جبکہ متاثرہ شہری کا کہنا ہے کہ وہ اس وقت اسکیم 33 میں قائم اپنے گھر میں تھا۔
الیکٹرانک چالان میں متاثرہ شہری کے 6 ڈی میرٹ پوائنٹس بھی مینشن کردیے گئے ہیں، متاثرہ شہری نے اس طرح کے چالان پر فریاد کرتے ہوئے کہا کہ آج تک کبھی میرا چالان نہیں ہوا، اس چالان سے شدید ذہنی اذیت اور دباؤ کا شکار ہوں۔
متاثرہ شہری نے دہائی دی کہ اگر الیکٹرانک چالان میں اتنی سنگین غلطیاں ہونے لگیں تو شہری کہاں جائیں گے، چالان ہیلمٹ پہنے بغیر موٹر سائیکل چلانے پر ڈھائی ہزار روپے کا کیا گیا ہے