’طالبان بھارت پر یقین نہ کریں اور پاکستان کیخلاف افغان سرزمین استعمال نہ ہونے دیں‘

امیر جماعت اسلامی پاکستان حافظ نعیم الرحمان نے طالبان پر زور دیا ہے کہ وہ بھارت پر یقین نہ کریں اور اپنی سرزمین پاکستان کے خلاف استعمال نہ ہونے دے۔
پشاور میں غزہ مارچ سے خطاب کرتے ہوئے حافظ نعیم الرحمان نے کہا کہ افغان حکومت کو ذمہ داری کا مظاہرہ کرنا چاہئے افغان حکومت کو کہنا چاہتا ہوں کہ بھارت کبھی آپ کا دوست نہیں بن سکتا اگر مشکل وقت آیا تو بھارت افغانستان کا ساتھ نہیں دے گا بلکہ جشن منائےگا۔
حافظ نعیم الرحمان نے کہا کہ افغان حکومت کو چاہیے اپنی سرزمین پاکستان کیخلاف استعمال نہ ہونے دے، حالات سدھارنے کیلئے جماعت اسلامی اپنا کردار ادا کرنے کیلئے تیار ہے۔
ان کا کہنا تھا کہ افغانستان کی سرزمین پاکستان کےخلاف استعمال ہو رہی ہے، بھارت کبھی بھی مسلمانوں کا دوست نہیں بن سکتا افغان طالبان کو کہتا ہوں بھارت کبھی آپ کا خیرخواہ نہیں ہو سکتا اس لیے طالبان کبھی بھارت پر یقین نہ کریں، پاکستان اور افغانستان کو چاہیے کہ دونوں ممالک دہشت گردی کیخلاف مشترکہ لائحہ عمل طےکریں۔
امیر جماعت اسلامی نے کہنا تھا کہ ہم ایک نظریاتی قوم ہیں جماعت اسلامی نے پورے پاکستان میں لوگوں کو منظم کیا، ملک میں انقلاب لانے کیلئے صرف جماعت اسلامی واحد حل ہے ملک میں نظام بدلنےکی شروعات مینارپاکستان سے کریں گے