جنوبی افریقا کے اسپنر موتھوسیمی نے پاکستان کے خلاف 41 سال پرانا ریکارڈ برابر کردیا۔
لاہور ٹیسٹ فیصلہ کن مرحلے میں داخل ہوگیا، جنوبی افریقا کو جیت کے لیے 226 رنز اور پاکستان کو 8 وکٹیں درکار ہیں۔
تیسرے روز کھیل کے اختتام پر جنوبی افریقا نے پاکستان کی جانب سے دیے گئے 277 رنز کے ہدف کے تعاقب میں 2 وکٹوں کے نقصان پر 51 رنز بنالیے۔
ریکلٹن 29 اور ڈی زورزی 16 رنز بنا کر ناٹ آؤٹ ہیں، پاکستان کی جانب سے نعمان علی نے ایڈن مارکرم اور ملڈر کو آؤٹ کیا۔
تاہم موتھوسیمی نے تاریخ رقم کی اور وہ پاکستان میں کھیلے گئے ٹیسٹ میچ کی دونوں اننگز میں پانچ وکٹیں لینے والے دوسرے بولر بن گئے ہیں۔
جنوبی افریقی اسپنر نے پہلی اننگز میں 117 رنز دے کر 6 وکٹیں حاصل کیں، اور دوسری اننگز میں 57 رنز کے عوض پانچ کھلاڑیوں کو آؤٹ کرکے یہ اعزاز حاصل کیا۔
اس سے قبل 1984 میں انگلینڈ نک کک نے کراچی ٹیسٹ میچ میں 65 رنز کے عوض 6 اور 18 رنز دے کر 5 وکٹیں حاصل کرکے یہ اعزاز حاصل کیا تھا۔
موتھوسیمی نے میچ میں 174 رنز کے عوض 11 وکٹیں حاصل کی ہیں اور 2021 میں فاسٹ بولر حسن علی کا ریکارڈ بھی توڑ دیا ہے جنہوں نے 114 رنز دے کر 10 وکٹیں حاصل کی تھیں۔
