کراچی (11 ستمبر 2025): صوبائی وزیر اطلاعات سندھ شرجیل انعام میمن نے بانی پاکستان قائداعظم محمد علی جناح کو خراجِ عقیدت پیش کرتے ہوئے کہا ہے کہ آج پوری قوم اس عظیم قائد کی بصیرت اور جدوجہد کو سلام پیش کر رہی ہے جنہوں نے ہمیں ایک آزاد مملکت عطا کی۔
انہوں نے کہا کہ “یہ دن اس تجدیدِ عہد کا ہے کہ ہم قائداعظم کے اصولوں اور رہنمائی کو اپنی زندگیوں میں شامل کریں۔” شرجیل میمن نے کہا کہ قائداعظم نے اتحاد، تنظیم اور یقینِ محکم کو پاکستان کی بنیاد قرار دیا، اور یہی اصول آج بھی ہماری کامیابی اور ترقی کی ضمانت ہیں۔
صوبائی وزیر نے موجودہ ملکی حالات کا ذکر کرتے ہوئے کہا کہ قوم کو اس بات کا ادراک ہونا چاہیے کہ موجودہ چیلنجز کا مقابلہ صرف قومی یکجہتی، اتحاد اور قربانی سے ہی کیا جا سکتا ہے۔
انہوں نے زور دیا کہ “آج کے دن ہمیں محض یادگار تقاریر سے آگے بڑھ کر عملی اقدامات کرنے ہوں گے تاکہ ہم قائداعظم کے وژن کو حقیقت کا روپ دے سکیں۔“
شرجیل انعام میمن نے یقین دلایا کہ سندھ حکومت قائداعظم کے سنہری اصولوں پر کاربند رہتے ہوئے عوام کی خدمت، قانون کی بالادستی، اور ایک پرامن، انصاف پر مبنی اور خوشحال پاکستان کی تعمیر کے لیے اپنی کوششیں جاری رکھے گی۔
