بنگلادیش کے معروف طالب علم رہنما اور سیاسی پلیٹ فارم انقلاب منچہ کے ترجمان شریف عثمان ہادی کی میت سنگاپور سے ڈھاکا پہنچا دی گئی ہے۔
بنگلادیشی میڈیا رپورٹس کے مطابق بنگلادیش ایئرلائن کا طیارہ آج شام شریف عثمان ہادی کی میت لے کر سنگاپور سے ڈھاکا پہنچا۔ میت کو بنگلادیش کے قومی پرچم میں لپیٹا گیا تھا، جس پر شہریوں اور سیاسی حلقوں کی جانب سے گہرے رنج و غم کا اظہار کیا جا رہا ہے۔
چیف ایڈوائزر کے پریس ونگ کی جانب سے جاری بیان کے مطابق شریف عثمان ہادی کی نمازِ جنازہ کل دوپہر 2 بجے بنگلادیشی پارلیمنٹ کے ساؤتھ پلازا میں ادا کی جائے گی۔
بیان میں مزید کہا گیا ہے کہ نمازِ جنازہ میں شرکت کے خواہشمند افراد کسی بھی قسم کے بیگ یا بھاری اشیا ساتھ نہ لائیں۔ سیکیورٹی خدشات کے پیش نظر پارلیمنٹ ہاؤس اور اس کے اطراف میں ڈرون اڑانے پر مکمل پابندی عائد کر دی گئی ہے۔
واضح رہے کہ شریف عثمان ہادی کے قتل کے بعد بنگلادیش میں سیاسی فضا خاصی کشیدہ ہے اور ملک کے مختلف شہروں میں احتجاجی مظاہرے بھی دیکھنے میں آئے ہیں۔
