صدرِ مملکت آصف علی زرداری نے ڈگری کیس میں نااہل قرار پانے والے اسلام آباد ہائیکورٹ کے جسٹس طارق محمود جہانگیری کو جج کے عہدے سے ڈی نوٹیفائی کرنے کی منظوری دے دی ہے۔
یہ فیصلہ اسلام آباد ہائیکورٹ کے فیصلے کی روشنی میں کیا گیا، جس میں جسٹس طارق محمود جہانگیری کی تقرری کو غیرقانونی قرار دیا گیا تھا۔
اسلام آباد ہائیکورٹ نے اپنے فیصلے میں کہا تھا کہ جسٹس طارق محمود جہانگیری تقرری کے وقت درست ایل ایل بی ڈگری کے اہل نہیں تھے، جس کے باعث انہیں عہدہ خالی کرنے کی ہدایت جاری کی گئی تھی۔
عدالتی فیصلے کے بعد صدرِ پاکستان نے آئینی و قانونی تقاضوں کے مطابق جسٹس طارق محمود جہانگیری کی بطور جج تقرری کو ختم کرنے کی منظوری دے دی۔
قانونی ماہرین کے مطابق یہ فیصلہ عدالتی نظام میں شفافیت اور میرٹ کو یقینی بنانے کی جانب ایک اہم قدم قرار دیا جا رہا ہے۔
