لکھنو میں دھند کے باعث بھارت اور جنوبی افریقا کے درمیان چوتھا ٹی ٹوئنٹی میچ ختم ہونے پر شائقینِ کرکٹ کی جانب سے ٹکٹوں کی رقم واپس کرنے کا مطالبہ بالآخر تسلیم کر لیا گیا ہے۔
گزشتہ روز شدید دھند کے باعث بھارت اور جنوبی افریقا کے درمیان کھیلا جانے والا چوتھا ٹی ٹوئنٹی میچ مکمل نہ ہو سکا، جس پر شائقین نے سخت ردِعمل دیتے ہوئے ٹکٹوں کے ری فنڈ کا مطالبہ کیا تھا۔
شائقین کے مطالبے پر اتر پردیش کرکٹ ایسوسی ایشن نے ٹکٹوں کی رقم واپس کرنے کی تصدیق کر دی ہے۔ یو پی سی اے کے سیکرٹری پریم منوہر کے مطابق اسٹیڈیم میں موجود تمام شائقین کو ٹکٹوں کی مکمل رقم واپس کی جائے گی، جبکہ آن لائن بکنگ کروانے والے شائقین کو بھی اسی طریقہ کار کے تحت رقم واپس ملے گی۔
پریم منوہر کا کہنا تھا کہ ٹکٹوں کے ری فنڈ سے متعلق گائیڈ لائنز جاری کر دی گئی ہیں اور شائقین کو اس حوالے سے ای میل کے ذریعے آگاہ کیا جائے گا۔
واضح رہے کہ حدِ نگاہ کم ہونے کے باعث چھ مرتبہ انسپکشن کے بعد میچ کو ختم کرنے کا فیصلہ کیا گیا تھا، تاہم بھارتی میڈیا نے میچ کے خاتمے کی وجہ دھند کے بجائے اسموگ کو قرار دیا ہے۔
