پاکستان ہاکی ٹیم کے منیجر انجم سعید غیر ملکی دورے سے وطن واپسی کے دوران مبینہ طور پر جہاز میں سگریٹ نوشی کرتے پکڑے گئے، جس کے بعد انہیں آف لوڈ کر دیا گیا۔
ذرائع کے مطابق پاکستان ہاکی ٹیم ارجنٹینا کے دورے کے بعد وطن واپس آ رہی تھی، اس دوران جہاز ٹرانزٹ کے لیے برازیل کے ایک ایئرپورٹ پر رکا۔ جہاز کے رکنے کے بعد منیجر انجم سعید نے مبینہ طور پر سگریٹ نوشی کی۔
ذرائع کا کہنا ہے کہ جہاز کے عملے کی جانب سے شکایت سامنے آنے پر سیکیورٹی عملے نے فوری کارروائی کرتے ہوئے انجم سعید کو جہاز سے آف لوڈ کر دیا۔ اس واقعے کے بعد منیجر انجم سعید اور ایک کھلاڑی کے علاوہ باقی تمام اسکواڈ وطن واپسی کے لیے روانہ ہو گیا۔
ذرائع کے مطابق انجم سعید کے معاملے پر پوری ٹیم نے سیکیورٹی عملے سے منت سماجت بھی کی، تاہم جہاز میں سگریٹ نوشی کے حوالے سے سخت قوانین کے باعث سیکیورٹی حکام نے کسی قسم کی رعایت نہ دی اور قواعد کے مطابق کارروائی عمل میں لائی گئی۔
