شاہ محمود قریشی سے اہم سیاسی ملاقات!

: تحریک انصاف کے اسیر رہنما شاہ محمود قریشی سے اسپتال میں پی ٹی آئی کے سابق رہنماؤں نے اہم ملاقات کی ہے۔
اے آر وائی نیوز کو ذرائع سے ملنے والی اطلاعات کے مطابق پاکستان تحریک انصاف کے مرکزی سینئر وائس چیئرمین شاہ محمود قریشی جنہیں آج جیل سے لاہور میں پاکستان کڈنی اینڈ لیور انسٹی ٹیوٹ (پی کے ایل آئی) چیک اپ کے لیے لایا گیا تھا، وہاں ان سے پی ٹی آئی کے سابق رہنماؤں نے ملاقات کی ہے۔
ذرائع نے بتایا کہ ملاقات کرنے والوں میں سابق گورنر سندھ عمران اسماعیل، سابق وفاقی وزیر فواد چوہدری اور مولوی محمود شامل تھے۔ جنہوں نے شاہ محمود سے ان کی خیریت دریافت کی۔
اس ملاقات میں ملک میں موجودہ سیاسی صورتحال، آزاد کشمیر میں سیاسی کشمکش اور خیبر پختونخوا میں بننے والی نئی حکومت سے متعلق اہم امور پر گفتگو کی گئی۔
ذرائع کا کہنا ہے کہ سیاسی حلقے شاہ محمود قریشی سے ہونے والی اس ملاقات کو بہت اہمیت دے رہے ہیں اور مستقبل میں یہ ملاقات نئی سیاسی ڈیولپمنٹ کا پیش خیمہ بھی ہو سکتی ہے