خیبر پختونخوا میں سکیورٹی فورسز نے خفیہ اطلاعات کی بنیاد پر دو الگ الگ کارروائیوں کے دوران بھارتی پشت پناہی سے سرگرم 9 دہشت گردوں کو ہلاک کر دیا۔ یہ بات پاک فوج کے شعبہ تعلقاتِ عامہ (آئی ایس پی آر) نے اپنے بیان میں بتائی۔
ضلع ٹانک میں انٹیلی جنس معلومات پر کیے گئے آپریشن میں فتنۃ الخوارج کے ایک ٹھکانے کو مؤثر انداز میں نشانہ بنایا گیا، جہاں شدید فائرنگ کے تبادلے کے بعد 7 دہشت گرد مارے گئے۔ آپریشن کامیابی سے مکمل کر لیا گیا۔
اسی طرح ضلع لکی مروت میں بھی انٹیلی جنس کی بنیاد پر کارروائی کی گئی، جس کے نتیجے میں مزید 2 خوارج ہلاک ہوئے جبکہ ان کے قبضے سے اسلحہ اور گولہ بارود برآمد ہوا۔
بیان میں کہا گیا ہے کہ ہلاک دہشت گرد بھارتی حمایت یافتہ تھے اور مختلف دہشت گردانہ سرگرمیوں میں ملوث رہے۔ سکیورٹی فورسز نے علاقے میں ان کے سہولت کاروں اور نیٹ ورک کے مکمل خاتمے کے لیے کلیئرنس آپریشنز جاری رکھنے کے عزم کا اظہار کیا ہے۔
صدر آصف علی زرداری، وزیر اعظم شہباز شریف اور وفاقی وزیر داخلہ محسن نقوی نے فورسز کی پیشہ ورانہ مہارت اور جرات کو سراہا اور خوارج کے ناپاک عزائم کو خاک میں ملانے پر خراج تحسین پیش کیا۔ تینوں شخصیات نے کہا کہ سکیورٹی فورسز کی کامیاب کارروائیوں سے خیبر پختونخوا میں امن قائم کرنے کے عزم کو مزید تقویت ملی ہے۔
آئی ایس پی آر کا کہنا ہے کہ فتنہ الخوارج کے خلاف یہ کارروائیاں ملک سے دہشتگردی کے ناسور کے خاتمے تک جاری رہیں گی۔
