1895ء کو پیرس میں لوئی اور آگسٹ لومیر کی مختصر فلم کی نمائش دنیا کا پہلا کمرشل مووی شو بھی تھا جس کے لیے لوگوں نے باقاعدہ پیسے ادا کیے تھے۔ بعد کے برسوں میں خاموش اور ناطق فلموں کا سلسلہ بلیک اینڈ وائٹ سے رنگین ہوتا چلا گیا اور پھر فلم پروڈکشن کمپنیاں بیسویں صدی میں لوگوں کو سنیما گھروں تک لے آئیں اور یہ کاروبار ان کے لیے منافع بخش ثابت ہوا۔
آج جدید دور میں فلم کی دنیا میں موضوعات، تیاری کے مراحل میں ٹیکنالوجی کا استعمال ہی نہیں فلم کی تشہیر و نمائش کا طریقہ سب کچھ بدل چکا ہے، لیکن فلمی صنعت کے اوّلین دور کو دل چسپ اور یادگار بنانے میں جن فلم ساز اداروں اور کمپنیوں نے کردار ادا کیا تھا، ان کا ذکر ہمیشہ کیا جاتا رہے گا۔ یہ مضمون انہی سے متعلق ہے جس کے مصنّف عدنان حسین سید ہیں۔
پروڈکشن کمپنیاں فلمیں بنانے کے لیے فنڈنگ کرتی ہیں اور انسانی و دیگر وسائل بھی فراہم کرتی ہیں۔ گزشتہ تقریباً سوا سو سال کے عرصے میں کتنی ہی شاہکار فلمیں بنیں، جن کو دنیا کی عظیم الشان فلم کمپنیز نے پروڈیوس کیا۔ آج ہم دنیا کی دس صفِ اوّل کی فلم کمپنیز اور ان کے تخلیق کیے گئے، شاہکاروں کا جائزہ لیں گے۔
یونیورسل پکچرز
یونیورسل پکچرز کام کاسٹ کی ملکیت ہے، جو اپنی ذیلی کمپنی این بی سی یونیورسل کے تحت اس کا انتظام چلاتے ہیں۔ 1912 میں قائم ہونے والا یہ ادارہ امریکا کا سب سے قدیم اسٹوڈیو ہے۔ یونیورسل اسٹوڈیوز نے اس سو سال سے زائد عرصے میں کئی سدا بہار شاہکار تخلیق کیے ہیں۔ اس میں جراسک پارک، ای ٹی اور جاز جیسے باکس آفس ہٹس شامل ہیں، جن سب کو اسٹیون اسپیل برگ نے ڈائریکٹ کیا۔ اسپیل برگ کے علاوہ بھی یونیورسل نے کامیاب فرنچائزز تخلیق کیں، جن میں فاسٹ اینڈ دی فیوریئس، بورن آئیڈینٹٹی اور ہینی بال شامل ہیں۔ تادم تحریر تاریخ میں سب سے زیادہ بزنس کرنے والی 50 بہترین فلموں میں سے سات یونیورسل اسٹوڈیوز کی پیشکش تھیں، جن میں سے فیوریئس سیون کا شمار ٹاپ ٹین میں ہوتا ہے۔
اس اسٹوڈیو کی ایک ڈویژن یونیورسل اینیمیشن اسٹوڈیوز بھی ہے، جو اینیمیٹڈ فلمیں اور ٹی وی سیریز بناتی ہے۔ ان کی نمایاں فیچر فلموں میں ”دی لینڈ بیفور ٹائم“، ”این امریکن ٹیل“ اور ”بالٹو“ شامل ہیں۔ ایک اور ڈویژن کا نام ہے الیمیونیشن، جس کا آغاز کرس میلیڈانڈری نے 2007 میں کیا۔ اس اینیمیشن اسٹوڈیو کی کامیابی ہے ”ڈیسپیک ایبل می“ نامی فلم، جس نے 546.1 ملین ڈالر کا بزنس کیا۔ اس فلم سے ایک ایسی فرنچائز کا آغاز ہوا، جس نے باکس آفس پر 3 بلین ڈالرز کا بزنس کر لیا ہے۔ یونیورسل پکچرز کے دیگر ذیلی اداروں میں یونیورسل ہوم انٹرٹینمنٹ، ڈریم ورکس اینیمیشن، فوکس فیچرز اور ورکنگ ٹائٹل فلمز شامل ہیں۔
