سابق چیئرمین ایف بی آر شبر زیدی کے خلاف ایف آئی اے نے مقدمہ واپس لینے کے لیے خط لکھ دیا۔
ذرائع کے مطابق سابق چیئرمین ایف بی آر شبر زیدی کا نام مقدمے سے ایک دن بعد ہی نکالنے کا فیصلہ سامنے آگیا ہے، ایف آئی اے کرائم سرکل کی جانب سے بھجوائے گئے خط میں مقدمہ قانون کے تحت “سی کلاس” کرنے کی سفارش کی گئی ہے۔
ذرائع کے مطابق ایف آئی اے نے اپنے مراسلے میں عدالت سے اجازت طلب کی ہے کہ مقدمہ منسوخ کر کے اس کی رپورٹ باضابطہ طور پر عدالت میں جمع کرائی جائے۔
ایف آئی اے کا کہنا ہے کہ مقدمہ سی کلاس ہونے سے شبر زیدی اور دیگر ایف بی آر افسران کیخلاف مقدمہ خارج ہوجائے گا، نجی بینک انتظامیہ کے نام کالم نمبر دو میں بطور “نوٹ سینٹ اَپ فار ٹرائل ہوگا۔
ذرائع کا کہنا ہے کہ اس فیصلے کے بعد سابق چیئرمین ایف بی آر شبر زیدی اور ایف بی آر افسران کے خلاف مقدمہ ختم کر دیا جائے گا۔ فیلڈ یونٹ کی سفارش پر ڈسچارج رپورٹ عدالت میں جمع کرانے کی ہدایت کردی گئی ہے اور یہ حکم ڈائریکٹر ایف آئی اے کراچی زون کی منظوری سے جاری کیا گیا ہے۔
واضح رہے کہ سابق چیئرمین فیڈرل بورڈ آف ریونیو (ایف بی آر) شبر زیدی کے خلاف مالی بے ضابطگیوں اور اختیارات کے ناجائز استعمال کا ایک اہم معاملہ سامنے آیا جس کے بعد وفاقی تحقیقاتی ادارے (FIA) کے اینٹی کرپشن سرکل، کراچی نے شبر زیدی کے خلاف مقدمہ درج کیا تھا۔
اس مقدمے کے مطابق شبر زیدی پر بطور چیئرمین ایف بی آر (مئی 2019 سے جنوری 2020 کے درمیان) 16 ارب روپے سے زائد کے غیر مجاز انکم ٹیکس ریفنڈز کی منظوری دینے کا الزام ہے
