تفصیلات کے مطابق راولپنڈی کی ایک نجی لیبارٹری سے ڈینگی لاروا برآمد ہونے پر حکام نے نوٹس لے لیا، تھانہ بنی پولیس نے سید پور روڈ پر واقع نجی لیب کے خلاف مقدمہ بھی درج کر لیا۔
پولیس کے مطابق مقدمہ ڈسٹرکٹ ہیلتھ اتھارٹی کی مدعیت میں درج کیا گیا ہے، مقدمے کے مطابق چغتائی لیب کی چھت پر کھڑے پانی اور جنریٹر کے ساتھ فلٹر میں ڈینگی لاروا موجود تھا، مقدمے میں محکمہ صحت کے ملازمین اور پولیس سے مزاحمت کرنے اور مبینہ طور پر رشوت دینے کا الزام بھی شامل کیا گیا ہے۔
واضح رہے کہ راولپنڈی میں ڈینگی کے خطرناک وار تھمنے کا نام نہیں لے رہے، محکمہ صحت کے مطابق اب تک 8819 مریضوں کی اسکریننگ کی جا چکی ہے، جن میں سے 477 مریضوں میں ڈینگی وائرس کی تصدیق ہوئی۔ گزشتہ 24 گھنٹوں میں مزید 20 نئے کیسز رپورٹ ہوئے جب کہ اس وقت اسپتالوں میں 42 مریض زیر علاج ہیں۔ ڈینگی سے جاں بحق افراد کی تعداد میں بھی اضافہ ریکارڈ کیا گیا ہے۔
ڈینگی کے تدارک کے لیے 1499 ٹیموں نے 50 لاکھ سے زائد مقامات کی جانچ کی، جن میں سے 1 لاکھ 40 ہزار سے زائد مقامات پر ڈینگی لاروا برآمد ہوا۔ محکمہ صحت کے مطابق اب تک 1 لاکھ 59 ہزار سے زائد لاروے تلف کیے جا چکے ہیں۔
ڈینگی ایس او پیز کی خلاف ورزی پر سخت کارروائیاں بھی جاری ہیں، 1738 عمارتیں سیل، 3333 چالان، 4004 مقدمات درج جب کہ شہریوں پر 98 لاکھ 85 ہزار روپے جرمانے عائد کیے جا چکے ہیں۔ محکمہ صحت کے مطابق ڈینگی ہاٹ سپاٹس میں کوٹھا کلاں، سکھو جلال دین، چک جلال دین، محن پورہ اور دھوک علی اکبر شامل ہیں
