راولپنڈی اور اسلام اباد میں موبائل فون کی انٹرنیٹ سروس معطل ، راستے سیل

اسلام آباد : ٹی ایل پی کے ملین مارچ کے پیش نظر راولپنڈی اور اسلام اباد میں موبائل فون کی انٹرنیٹ سروس معطل کردی گئی جبکہ راستے بھی سیل کردیئے۔
تفصیلات کے مطابق راولپنڈی میں ٹی ایل پی ملین مارچ کے موقع پر سیکیورٹی کے سخت انتظامات کر دیے گئے جبکہ جڑواں شہروں راولپنڈی اور اسلام آباد میں موبائل فون اور انٹرنیٹ سروس معطل کر دی گئی ہے۔
انتظامیہ نے مارچ کے خدشے کے پیشِ نظر روات ٹی چوک، فیض آباد، 26 نمبر چونگی، کرال چوک اور بارہ کہو سمیت مختلف مقامات پر کنٹینرز لگا کر راستے سیل کر دیے ہیں جبکہ مری روڈ، ڈبل روڈ اور آئی جے پی روڈ سے اسلام آباد جانے والے راستے بھی بند کر دیے گئے ہیں۔
پولیس کی بھاری نفری تعینات ہے، جب کہ مختلف مقامات پر جڑواں شہروں کی پولیس کی مشترکہ چوکیاں قائم کر دی گئی ہیں۔
حکام کا کہنا ہے کہ راولپنڈی میں دفعہ 144 نافذ ہے اور میٹرو بس سروس معطل کر دی گئی ہے۔
حکام کے مطابق انٹرنیٹ سروس معطلی کا مقصد سیکیورٹی خدشات کے پیش نظر عوامی نظم و ضبط برقرار رکھنا اور ڈیجیٹل پلیٹ فارمز کے غلط استعمال کی روک تھام ہے
آر پی او راولپنڈی نے تمام اضلاع کے ڈی پی اوز کو صورتحال پر کڑی نظر رکھنے اور فول پروف سیکیورٹی انتظامات یقینی بنانے کی ہدایت کی ہے۔
ان کا کہنا ہے کہ سرکاری یا نجی املاک کو نقصان پہنچانے والوں کے خلاف سخت کارروائی کی جائے گی