چیئرمین پاکستان کرکٹ بورڈ محسن نقوی نے پاکستان سپر لیگ (پی ایس ایل) کے 11ویں ایڈیشن کے آغاز کا اعلان کر دیا ہے۔ نیویارک میں پی ایس ایل روڈ شو کے موقع پر گفتگو کرتے ہوئے انہوں نے بتایا کہ پی ایس ایل 11 کا آغاز 26 مارچ سے ہوگا جبکہ فائنل 3 مئی کو کھیلا جائے گا۔
محسن نقوی نے مزید اعلان کیا کہ پی ایس ایل میں شامل کی جانے والی دو نئی ٹیموں کے لیے بولیاں جمع کرانے کی تاریخ 22 دسمبر مقرر کر دی گئی ہے، جبکہ اس سے قبل ٹیموں کی نیلامی کی تاریخ 15 دسمبر رکھی گئی تھی۔ انہوں نے کہا کہ پی ایس ایل کو دنیا کی نمبر ون لیگ بنانے کا ویژن رکھتے ہیں اور اس مقصد کے لیے ہر ممکن اقدامات کیے جائیں گے۔
چیئرمین پی سی بی کا کہنا تھا کہ لیگ کی بہتری کے لیے تمام وسائل بروئے کار لائے جائیں گے، جبکہ کرکٹ ڈیولپمنٹ پر بھی بھرپور سرمایہ کاری کی جا رہی ہے۔ انہوں نے سرمایہ کاروں کو یقین دہانی کرواتے ہوئے کہا کہ ٹیموں کی بولی کا پورا عمل شفاف طریقے سے مکمل کیا جائے گا اور سرمایہ کار مطلوبہ معلومات کے لیے سی ای او پی ایس ایل سلمان نصیر سے رابطہ کر سکتے ہیں۔
