وفاقی وزیر اطلاعات و نشریات عطا اللہ تارڑ کا کہنا ہے کہ پاکستان کی دہشتگردی کے خلاف قربانیاں پوری دنیا کے امن کیلیے ہیں۔
امریکی ناظم الامور نیٹلی بیکر نے وفاقی وزیر عطا اللہ تارڑ سے ملاقات کی، اس دوران دو طرفہ تعلقات اور ڈیجیٹل میڈیا شراکت داری سمیت مختلف امور پر تبادلہ خیال کیا گیا۔ ملاقات میں دہشتگردی کے خلاف پاکستان کے صفِ اول کے کردار کی ستائش کی گئی۔
اس موقع پر امریکی ناظم الامور نے کہا کہ پاکستان کی معیشت استحکام اور ترقی کی سمت بڑھ رہی ہے۔
ملاقات میں دہشتگردی پر گفتگو کرتے ہوئے وفاقی وزیر عطا اللہ تارڑ نے کہا کہ دہشتگردی کے خلاف پاکستان صفِ اول کا کردار ادا کر رہا ہے، پاکستان کی دہشتگردی کے خلاف قربانیاں پوری دنیا کے امن کیلیے ہیں۔
انہوں نے کہا کہ حکومت نے فیک نیوز کے خاتمے اور ڈیجیٹلائزیشن کے فروغ کیلیے جامع پالیسی متعارف کروائی ہے، پاکستان قدرتی حسن، ثقافتی تنوع اور تاریخی ورثے سے مالا مال ملک ہے، سیاحت کے فروغ سے معاشی سرگرمیوں میں اضافہ اور دونوں ممالک کے عوام میں روابط مضبوط ہوں گے۔
عطا اللہ تارڑ نے مزید کہا کہ حکومت سیاحت کے فروغ کیلیے ٹھوس اقدامات کر رہی ہے، جس کا مقصد پاکستان کو عالمی سیاحتی نقشے پر نمایاں مقام دلانا ہے۔
ان کا کہنا تھا کہ صحافیوں کی فلاح و بہبود کیلیے بھی قانون سازی کی جا رہی ہے۔ اس پر امریکی ناظم الامور نے پاکستان کی جانب سے صحافیوں کے تحفظ کیلیے اقدامات کو سراہا۔
