پاکستان کے لیے ایک ارب ڈالر آئل فیسیلٹی کا اعلان

اسلام آباد(27 اکتوبر 2025): ذرائع کا کہنا ہے کہ سعودی عرب رواں مالی سال پاکستان کو ایک ارب ڈالر کی آئل فیسیلٹی دے گا جبکہ 5 ارب ڈالر کے ڈیپازٹس بھی رول اوور کرے گا۔
ذرائع کا کہنا ہے کہ  وفاقی حکومت کا رواں مالی سال 19 ارب 92 کروڑ ڈالر سے زائد کی بیرونی فنانسنگ کا تخمینہ ہے جبکہ رواں مالی سال سعودی عرب اور چین سے 9 ارب ڈالر سیف ڈیپازٹ کو رول اوور کا تخمینہ لگایا گیا ہے۔
ذرائع کا کہنا ہے کہ سعودی عرب سے 5 ارب ڈالر ڈپازٹ اور چین سے 4 ارب ڈالرکے سیف ڈیپازٹ کو رول اوور کرایا جائیگا اور یہ آئی ایم ایف کیساتھ کمٹمنٹ میں بھی شامل ہے۔
ذرائع کا کہنا ہے کہ رواں مالی سال مجموعی طور پر 25 ارب ڈالر سے زائد قرض حاصل کرنے کا تخمینہ ہے اور دوست ممالک کے 12 ارب ڈالر رول اوور کرانے کا ہدف ہے، رواں مالی 2 ارب ڈالر آئی ایم ایف قرض قسط پلان میں شامل ہے۔
ذرائع کا کہنا ہے کہ سعودی عرب اور چین کے 9 ارب ڈالر کو رول اوور کرانے کی ذمہ داری وزارت خزانہ کی ہے، یو اے ای کے 3 ارب ڈالر مرکزی بینک رول اوور کرائے گا، پروجیکٹ فنانسنگ کی مد میں عالمی بینک، ایشیائی ترقیاتی بینک اور دیگر مالیاتی ادارے شامل ہیں۔
ذرائع کا بتانا ہے کہ رواں مالی سال چائنیز مارکیٹ میں 25 کروڑ ڈالر پانڈا بانڈز کا تخمینہ لگایا گیا ہے، رواں مالی سال  آئی ایم ایف سے ایکسٹنڈڈ فنڈز فیسیلٹی قرض پروگرام کے تحت 2 ارب ڈالر سے زائد تخمینہ ہے اور ایشیائی ترقیاتی بینک سے 1 ارب 92 کروڑ 40 لاکھ ڈالر موصول ہونے کا تخمینہ ہے۔
ذرائع نے مزید بتایا کہ رواں مالی سال عالمی بینک گروپ سے 1 ارب 66 کروڑ 39 لاکھ ڈالر، اسلامک ڈیولپمنٹ بینک سے 86کروڑ ڈالر کا تخمینہ ہے، رواں مالی سال کیلئے 40 کروڑ ڈالر کے بانڈز کا اجرا کا پلان ہے، رواں مالی سال 61 کروڑ ڈالر کے نیا پاکستان سرٹیفکیٹس جاری کیے جائیں گے۔