پاکستان کے ایٹمی پروگرام کی رفتار قابل تعریف ہے، ڈی جی آئی اے ای اے

ڈی جی آئی اے ای اے کا کہنا ہے کہ پاکستان کا نیوکلیئر پاور پروگرام اچھی رفتار سے آگے بڑھ رہا ہے، پُرامن مقاصد کےلیے جوہری سائنس و ٹیکنالوجی کے استعمال میں پاکستان اہم شراکت دار ہے۔
اے آر وائی نیوز کی رپورٹ کے مطابق ویانا میں 69 ویں جنرل کانفرنس پر ڈی جی آئی اے ای اے نے چیئرمین پی اے ای سی سے ملاقات کی۔
اس موقع پر انہوں نے پاکستان کے سول نیوکلیئر انرجی پروگرام میں پیشرفت کی تعریف کرتے ہوئے اس بات کا برملا اعتراف کیا کہ پاکستان کا نیوکلیئر پاور پروگرام اچھی رفتار سے آگے بڑھ رہا ہے۔
ڈی جی آئی اے ای اے کا کہنا تھا کہ چشمہ نیوکلیئر پاور پلانٹ سی 5 پاکستان کی جوہری توانائی میں اہم سنگ میل ہے۔
اس موقع پر چیئرمین پی اے ای سی ڈاکٹر راجہ علی رضا انور نے بتایا کہ پاکستانی نیوکلیئر پاور پلانٹس اعلیٰ ترین حفاظتی معیار کے مطابق کامیابی سے چل رہے ہیں۔
انہوں نے کہا کہ ہماری سرگرمیاں آئی اے ای اے کے وژن سے ہم آہنگ ہیں، پاکستان پرامن جوہری تعاون اور پائیدار ترقی کے لیے پرعزم ہے