پاکستان کا بھارتی عسکری قیادت کے غیر ذمہ دارانہ بیانات پر شدید تشویش کا اظہار

راولپنڈی : پاکستان نے بھارتی عسکری قیادت کے غیر ذمہ دارانہ بیانات پر شدید تشویش کا اظہار کرتے ہوئے خبردار کیا ہے کہ ہر جارحیت کا جواب پوری قوت سے دیا جائے گا جسےآئندہ نسلیں یادرکھیں گی۔
تفصیلات کے مطابق پاک فوج کے ترجمان آئی ایس پی آر کی جانب سے بھارتی عسکری قیادت کی جانب سے جاری کیے گئے بیانات کو “غیر ذمہ دارانہ” قرار دیتے ہوئے گہری تشویش کا اظہار کیا ہے۔
آئی ایس پی آر کا کہنا تھا کہ بہار اور مغربی بنگال کے انتخابات کے موقع پر بے بنیاد اور اشتعال انگیز پروپیگنڈا کیا جا رہا ہے، معرکۂ حق کے محض پانچ ماہ بعد ریاستی انتخابات میں سیاسی مقاصد کے لیے فوجی بیان بازی تشویشناک ہے۔
ترجمان نے کہا کہ جوہری ریاست کی عسکری قیادت کے سیاسی بیانات افسوسناک ہیں اور یہ بھارتی عوام اور عالمی برادری کے لیے بھی باعثِ شرمندگی ہیں ، کسی بھی پروفیشنل فوج کو سیاسی یا غیر ذمہ دارانہ بیانات سے اجتناب کرنا چاہیے۔
آئی ایس پی آر نے مزید کہا کہ غیر ذمہ دارانہ بیانات جنوبی ایشیا کے امن واستحکام کیلئے سنگین نتائج کاباعث بن سکتے ہیں، ہندوستانی قیادت بالی ووڈ طرز کے اسکرپٹ بنا کر من پسند تاریخ لکھنے کی کوشش کررہی ہے۔
ترجمان کا کہنا تھا کہ بھارتی فوج اور سیاسی قیادت کے خیالات میں تضاد نظر آتا ہے، بھارت کو معرکہ حق میں فیصلہ کن شکست ہوئی، بھارت کا جھوٹ پوری طرح بے نقاب ہوچکا ہے ، بھارت اپنی خفت مٹانے کیلئے پڑوسیوں کو نقصان پہنچانے کی مہم جوئی کررہاہے۔
پاک فوج کے ترجمان نے خبردار کیا پاکستان کے عوام اور مسلح افواج وطن کے چپے چپے کا دفاع کرنا جانتی ہیں، ہندوستانی مسلح افواج اور سیاسی آقاؤں کو کسی غلط فہمی میں رہنا نہیں چاہیے، ہر جارحیت کا جواب پوری قوت اور فوری دیا جائے گا، جسے آئندہ نسلیں یاد رکھیں گی۔