پاکستان اور بھارت روایتی حریف ہیں۔ بات سیاست کی ہو یا میدان کھیل کا، جب بھی دونوں کا ٹاکرا ہوتا ہے تو دونوں جانب جوش اور جذبات عروج پر ہوتے ہیں۔ کوئی بھی خود کو ہارتا دیکھنا نہیں چاہتا اور دوسرے کو چت کرنے کی خواہش ہوتی ہے۔
آج جب بھارتی کھلاڑی متعصب ہندو توا مودی سرکار کے زیر اثر پاکستانی کھلاڑیوں سے ہاتھ نہیں ملا رہے۔ لیکن ایک وقت ایسا بھی تھا، جب ایسے کھلاڑی بھی سامنے آئے جنہوں نے متعدد بار دونوں ممالک کی جانب سے انٹرنیشنل کرکٹ کھیلی اور ریکارڈ بنائے۔
یہ وہ کھلاڑی ہیں، جو قیام پاکستان سے قبل ہندوستان ٹیم کی نمائندگی کرتے ہوئے بین الاقوامی کرکٹ کھیلے اور جب ہندوستان تقسیم ہوا اور پاکستان وجود میں آیا تو یہ کھلاڑی سبز ہلالی پرچم تلے نہ صرف دیگر ممالک بلکہ اس ٹیم (بھارتی) سے بھی مقابلے پر اترے، جس کے لیے وہ کبھی کھیلا کرتے تھے۔
عبدالحفیظ کاردار:
پاکستان کرکٹ ٹیم کے پہلے کپتان عبدالحفیظ کاردار کو صرف یہ اعزاز ہی حاصل نہیں کہ وہ پاکستان ٹیم کے پہلے کپتان تھے، بلکہ وہ غیر منقسم ہندوستان میں بھی ہندوستانی ٹیم کی قیادت کر چکے تھے۔
لاہور میں پیدا ہونے والے عبدالحفیظ کاردار نے ہندوستانی ٹیم کے لیے ٹیسٹ ڈیبیو کیا اور 1946 میں انگلینڈ کے دورے کے دوران تین ٹیسٹ میچ کھیلے۔ لیکن آزادی اور تقسیم کے بعد وہ پاکستانی ٹیم میں شامل ہوئے اور وہاں اپنی صلاحیتوں کا لوہا منوایا۔
وہ اپنے سابقہ ٹیم میٹ کھلاڑیوں پر مبنی ہندوستانی ٹیم کے مقابل 1952 میں آئے اور پاکستان ٹیم کی قیادت کی۔ انہوں نے 23 ٹیسٹ میچوں میں پاکستان کی قیادت کرتے ہوئے 847 رنز بنائے۔
عبدالحفیظ کاردار کھیلوں کی تاریخ کے اولین کھلاڑی ہیں، جنہوں نے اپنے کیریئر میں دو ممالک کی ٹیموں کی کپتانی کی۔
گل محمد:
بائیں ہاتھ سے بیٹنگ کرنے والے گل محمد نے 1946 سے 1952 تک ہندوستانی ٹیم کی جانب سے انٹرنیشنل کرکٹ کھیلی اور 8 ٹیسٹ میچوں میں نمائندگی کی۔ بعد ازاں وہ پاکستان آئے اور قومی ٹیم میں شامل ہوئے۔
تاہم انہوں نے پاکستان کی جانب سے 1956 میں صرف ایک میچ ہی کھیلا۔ وہ آسٹریلیا کے خلاف ہوم ٹیسٹ کھیلنے والی ٹیم کا حصہ تھے۔ اس میں اگرچہ ان کی کارکردگی متاثر کن نہیں تھی اور دونوں اننگز میں مجموعی طور پر صرف 39 ہی بنائے تھے۔ تاہم انہیں یہ اعزاز حاصل ہے کہ آسٹریلیا کے خلاف جیتے گئے پہلے ٹیسٹ میچ کا وننگ شاٹ انہوں نے ہی کھیلا تھا۔
عامر الٰہی:
قیام پاکستان سے چند ماہ قبل 1947 میں فاسٹ بولر عامر الٰہی نے ہندوستانی ٹیم کی جانب سے ڈیبیو کیا اور آسٹریلیا کے خلاف ٹیسٹ میچ کھیلا۔
