واشنگٹن (20 نومبر 2025): امریکی صدر ڈونلڈ ٹرمپ جمعہ کو اوول آفس میں نیویارک سٹی کے منتخب میئر ظہران ممدانی سے ملاقات کریں گے۔
امریکی صدر ڈونلڈ ٹرمپ نے بدھ کے روز کہا کہ وہ جمعے کو وائٹ ہاؤس میں نیویارک کے نومنتخب میئر ظہران ممدانی سے ملاقات کریں گے۔
ٹرمپ نے اپنے سوشل میڈیا پلیٹ فارم ’ٹروتھ سوشل‘ پر لکھا: ’’نیویارک سٹی کے کمیونسٹ میئر، ظہران ممدانی نے ملاقات کی درخواست کی ہے۔ ہم اس بات پر متفق ہوئے ہیں کہ یہ ملاقات جمعہ، 21 نومبر کو اوول آفس میں ہوگی۔ مزید تفصیلات بعد میں بتائی جائیں گی!‘‘
ممدانی، جو ملک کے سب سے بڑے شہر کے پہلے مسلمان اور جنوبی ایشیائی میئر ہیں، نے اس ماہ کے اوائل میں نیویارک کے عام انتخابات میں سابق گورنر اینڈریو کومو اور ریپبلکن کرٹس سلِیوا کو شکست دی تھی۔ انھوں نے یہ کامیابی ایک ترقی پسند مہم کے ذریعے حاصل کی جس کا محور رہائش کو قابلِ استطاعت بنانا اور سوشل سروسز تھا۔
مہم کے دوران ٹرمپ نے 34 سالہ ڈیموکریٹک سوشلسٹ ظہران ممدانی پر بارہا حملہ کیا اور انھیں ’کمیونسٹ‘ قرار دیا، اور ان کے حریف کومو کی حمایت کی، اور خبردار کیا کہ اگر ممدانی جیت گئے تو وہ نیویارک سٹی کی وفاقی فنڈنگ میں کٹوتی کر سکتے ہیں۔
دوسری طرف ممدانی نے اس ماہ کے اوائل میں دوبارہ کہا تھا کہ وہ ٹرمپ سے بات کرنے کے لیے تیار ہیں، لیکن وہ کسی ایسے مکالمے کو قبول نہیں کریں گے جو ’’نیویارک کے باشندوں کی قیمت پر ہو۔‘‘
