ملک میں ہفتہ نماز اور زکوٰۃ منانے کا اعلان!

اسلام آباد – قومی علما مشائخ کونسل نے ملک میں نظام صلٰوۃ و زکٰوۃ کے فروغ کیلیے ہفتہ نماز اور زکوٰۃ منانے کا اعلان کیا ہے۔
رہنما نیوز کے مطابق قومی علما مشائخ کونسل کا اجلاس اسلام آباد میں ہوا۔ جس میں وفاقی وزیر مذہبی امور سردار یوسف نے خطاب کرتے ہوئے بتایا اجلاس میں نظام صلٰوۃ و دیگر امور پرعلما ومشائخ سے مشاورت کی گئی ہے اور ملک میں نظام صلٰوۃ وزکٰوۃ کیلیے ہفتہ نماز اور زکوٰۃ منایا جائے گا۔
اجلاس کے بعد جاری اعلامیہ میں کہا گیا کہ اسلام میں منبرومحراب معاشرے کی فکری رہنمائی کا اہم ذریعہ ہے۔ علما ومشائخ کو ملک میں امن کا گہوارہ بنانے کے لیے کردار ادا کرنا چاہیے۔
اعلامیہ میں ہفتہ نماز اور زکوٰۃ منانے کے اعلان کے ساتھ کہا گیا کہ نفرت آمیز تقاریر سے گریز کیا جائے گا۔ خطابات میں اجتماعی ذمہ داری اور اخلاقی تربیت جیسے موضوعات شامل کیے جائیں گے۔
اعلامیہ میں یہ بھی کہا گیا کہ فتویٰ صرف مستند دینی ادارے ہی جاری کریں گے۔ عوام کو سوشل میڈیا کے مثبت استعمال کی آگہی دی جائے گی۔ جب کہ نماز دین کا بنیادی جزو ہے۔ نظام صلوٰۃ کمیٹی کی تشکیل نو کی جائے گی۔
اجلاس کے شرکا نے معرکہ حق میں وزیراعظم اور مسلح افواج کی قیادت کو خراج تحسین پیش کیا۔ پاکستان اور سعودی عرب کے درمیان دفاعی معاہدے کا خیر مقدم کرتے ہوئے عالم اسلام کو مبارک باد دی