آزاد جموں و کشمیر سمیت ملک بھر میں آج یومِ یکجہتیٔ کشمیر بھرپور عقیدت و احترام کے ساتھ منایا گیا، اس سلسلے میں مظفر آباد میں صبح 9 سے 10 بجے کے درمیان سائرن بجائے گئے اور کشمیری شہداء کے لیے ایک منٹ کی خاموشی اختیار کی گئی۔
کشمیری عوام سے اظہارِ یکجہتی کے لیے مختلف تقاریب منعقد ہوئیں جبکہ پاکستان اور آزاد کشمیر کو ملانے والے راستوں پر انسانی ہاتھوں کی زنجیر بھی بنائی گئی۔ خصوصی اجلاس سے خطاب کرتے ہوئے شہباز شریف نے کہا کہ پاکستانی قوم کشمیریوں کے حقِ خودارادیت کی جدوجہد میں ان کے شانہ بشانہ کھڑی ہے اور ہر سطح پر ان کی حمایت جاری رکھے گی۔
