وزیراعظم شہباز شریف کی زیر صدارت ایڈز اور ہیپاٹائٹس سی سمیت متعدی امراض کے پھیلاؤ کی روک تھام سے متعلق اعلیٰ سطح کا جائزہ اجلاس منعقد ہوا، جس میں ملک بھر میں جاری اقدامات اور صورتحال کا تفصیلی جائزہ لیا گیا۔
وزیراعظم نے ہدایت کی کہ غیر معیاری سرنجوں کی تیاری اور استعمال پر ملک بھر میں مکمل پابندی عائد کی جائے اور خلاف ورزی میں ملوث افراد، اداروں اور اسپتالوں کے خلاف سخت قانونی کارروائی عمل میں لائی جائے۔
انہوں نے متعدی امراض کے مؤثر تدارک کے لیے ماہرین پر مشتمل خصوصی کمیٹی کے قیام، صوبوں سے مشاورت کے تسلسل اور وزارت قانون کو متعلقہ اداروں کے ساتھ مل کر قانونی و ضابطہ جاتی اصلاحات کی سفارشات تیار کرنے کی بھی ہدایت کی۔
وزیراعظم نے کہا کہ اس مسئلے کے پائیدار حل کے لیے قومی سطح پر جامع حکمت عملی اور اس پر مؤثر عمل درآمد ناگزیر ہے۔
انہوں نے مزید ہدایت کی کہ ادارہ برائے ادویات پاکستان متعلقہ صنعت سے مشاورت کر کے سرنجوں کے ذریعے بیماریوں کے پھیلاؤ کی روک تھام کے لیے مؤثر پالیسی اقدامات تجویز کرے، جبکہ طبی آلات کی مقامی تیاری اور عالمی معیار کی تربیت پر بھی خصوصی توجہ دی جائے۔
اجلاس میں متعلقہ وفاقی وزراء، اعلیٰ حکام، ماہرین صحت اور بین الاقوامی نمائندوں نے شرکت کی اور متعدی امراض کے خلاف جاری اقدامات پر بریفنگ دی گئی۔
