محدود سطح پر بسنت منانے کی تیاریاں شروع

لاہور میں محدود سطح پر بسنت منانے کی تیاریاں شروع کردی گئی ہیں جس کے لیے حکومت کو سفارشات پیش کردی گئی ہیں۔
رہنما نیوز کے مطابق سینئر وزیر مریم اورنگزیب کی زیر صدارت اہم اجلاس میں فیصلہ کیا گیا کہ بسنت فیسٹیول صرف دو روز کے لیے ہفتہ اور اتوار کو ہوگا، اندرون لاہور کے علاقوں میں محدود سطح پر بسنت کی اجازت تجویز کی گئی ہے۔
شاہی قلعہ، موچی گیٹ، بھاٹی گیٹ، رنگ محل زونز میں بسنت منانے کی تجویز دی گئی ہے۔
بسنت کے لیے انتظامیہ نے محفوظ پلان تیار کرکے حکومت کو پیش کیا ہے، تیز دھاتی، نائیلون اور کیمیکل ڈور کے استعمال پر مکمل پابندی ہوگی، صرف کپاس یا نشاستے سے تیار شدہ ڈور کے استعمال کی اجازت ہوگی، ڈور اور پتنگوں پر بار کوڈ لازمی قرار دینا ہوگا۔
غیر رجسٹرڈ پتنگ فروشوں کے خلاف سخت کارروائی ہوگی، غیر محفوظ ڈور بنانے اور فروخت کرنے والوں کے خلاف کریک ڈاؤن ہوگا۔
علاوہ ازیں بسنت والے علاقوں میں موٹر سائیکلوں کے داخلے پر پابندی کی تجویز ہے، مین سڑکوں پر سیفٹی نیٹس اور وائر پروٹیکشن سسٹم نصب کیا جائے گا۔