وفاقی تعلیمی بورڈ نے نہم و دہم کے سالانہ امتحانات 2026 کے نتائج کا اعلان کر دیا۔ اس سال ٹاپ 10 میں سے 7 پوزیشنز طالبات نے اپنے نام کیں، جبکہ وفاقی سرکاری تعلیمی اداروں کا کوئی بھی طالبعلم نمایاں پوزیشن حاصل نہ کر سکا۔
نتائج کے اعلان کی تقریب کے مہمانِ خصوصی وفاقی وزیر تعلیم ڈاکٹر خالد مقبول صدیقی تھے۔ چیئرمین فیڈرل بورڈ کے مطابق رواں سال 2 لاکھ 92 ہزار 831 طلبہ و طالبات امتحانات میں شریک ہوئے، نقل کے 86 کیسز رپورٹ ہوئے، جبکہ امتحانات کے لیے ایک ہزار 6 مراکز قائم کیے گئے۔ امتحانی عمل کے دوران 2 ہزار 12 سپروائزری عملہ، 6 ہزار 996 انویجیلیٹرز اور 4 ہزار 855 اساتذہ نے پیپرز کی جانچ کی خدمات انجام دیں۔
سائنس گروپ میں افیرا اعجاز نے 1089 نمبروں کے ساتھ پہلی، آمنہ نعمان نے 1088 نمبروں کے ساتھ دوسری جبکہ حذیفہ حیدر نے 1086 نمبروں کے ساتھ تیسری پوزیشن حاصل کی۔
تقریب سے خطاب کرتے ہوئے وفاقی وزیر تعلیم ڈاکٹر خالد مقبول صدیقی نے کامیاب طلبہ کو مبارکباد دیتے ہوئے کہا کہ بدلتی دنیا کے تقاضوں کے مطابق خود کو ڈھالنا ناگزیر ہے، علم مومن کی میراث ہے اور اسی میراث کو جدید تقاضوں سے ہم آہنگ کرتے ہوئے آگے بڑھنا ہوگا۔
