ترجمان آزاد کشمیر پولیس ایس ایس پی خاور علی شوکت نے کہا ہے کہ شرپسند عناصر کے ساتھ کسی قسم کی رعایت نہیں برتی جائے گی اور ریاستی اداروں پر حملہ ہرگز برداشت نہیں کیا جائے گا۔
راولاکوٹ میں پریس کانفرنس کرتے ہوئے انہوں نے بتایا کہ مسلح حملہ آور شہر کی مختلف عمارتوں میں مورچہ بند ہیں، جبکہ گرفتار شرپسندوں سے جدید اسلحہ بھی برآمد ہوا ہے۔ ان کے مطابق حملوں میں ایک رینجرز اہلکار شہید ہوا، جبکہ قانون نافذ کرنے والے ادارے مسلح جتھوں کے خلاف کارروائیاں جاری رکھے ہوئے ہیں۔
ایس ایس پی خاور علی شوکت کا کہنا تھا کہ ملک دشمن عناصر سوشل میڈیا پر منفی پروپیگنڈا کر رہے ہیں اور شرپسند آزاد کشمیر کے امن کو نقصان پہنچانا چاہتے ہیں، تاہم ریاستی ادارے امن کے قیام کے لیے پرعزم ہیں۔ انہوں نے واضح کیا کہ قانون نافذ کرنے والے اداروں کے تحمل کو کمزوری نہ سمجھا جائے اور ریاستی اداروں پر حملہ کرنے والوں سے آہنی ہاتھوں سے نمٹا جائے گا۔
