میئر کراچی مرتضیٰ وہاب نے پی آئی ڈی سی ایل سے مطالبہ کیا ہے کہ منصوبوں کے مکمل ہونے کی تاریخ دی جائے، منصوبے کی تکمیل کی مقررہ مدت سے کے ایم سی کو مطمئن کیا جائے۔
انہوں نے کہا کہ 2017 کا این او سی اب تک مکمل نہیں ہوا، شہریوں کو مسائل کا سامنا ہے۔
میئر کراچی نے منصوبوں کی تاخیر پر شدید تنقید کی اور 2035 تک منصوبہ مکمل نہ ہونے کا خدشہ ظاہر کردیا۔
انہوں نے کہا کہ مقامی قیادت کو منصوبوں کی تکمیل میں شامل کیا جائے، مسائل کی وجہ سے شہر کی صورتحال خراب ہوتی ہے، ماضی میں گرین لائن پر ناگن اور کے ڈی اے چورنگی کی وجہ سے مسائل کا سامنا کرنا پڑا۔
مرتضیٰ وہاب کا کہنا ہے کہ اس وقت عوام کو یونیورسٹی روڈ پر ریڈ لائن کی وجہ سے بہت مسائل کا سامنا ہے۔
واضح رہے کہ کراچی میونسپل کارپوریشن نے گرین لائن توسیعی منصوبے پر کام کرنے والے کنٹریکٹرز کو ایم اے جناح روڈ پر تعمیراتی کام کرنے سے روک دیا ہے اور اس حوالے سے پاکستان انفرااسٹرکچر کمپنی لمیٹیڈ (پی آئی ڈی سی ایل) حکام کو خط لکھ کر بھی آگاہ کر دیا ہے
